Jowai, K’lyngkot 07 : Ka Dorbar Shnong Khimusniang, (DSK) Jowai mynta ka sngi Saitjaiñ kala rakhe ïa ka jingdap 75 snem jong ka shnong bad mynta ka dei ka sngi kaba la plie sdang ïa kane ka jingrakhe ka ban sa rakhe baroh shisnem lynter ïa kaba yn sa pynkut ha ka 31/12/2024.
Na ka liang u Chief Forest Officer, ka JHADC uba ju bat teng ïa ka kam Waheh Shnong jong ka Dorbar Shnong Khimusniang u ma F.W. Blah mynta ka sngi ula long u kongsan katba u ma J.K. Rymbai, President Synjuk Waheh Shnong Jowai ula long u Symbud Kongsan.
Ha kane ka sngi na ka liang ka DS Khimusniang kala khot sngewbha ruh ïa baroh ki Waheh Shnong jong ka nongbah Jowai kiba don hapoh ka shatri jong ka Synjuk ki Waheh Shnong, Jowai ban ïadon bynta bad sakhi lang ïa kane ka jinglehkmen Platinum Jubilee nalor kiwei de kiba la shah khot sngewbha.
La ïathuh ba ïaka DSK la seng ïa ka haka snem 1949 ha kaba la buh ruh ïa u maw ban pynsannam ïa ki 16 ngut ki riew rangbah kiba la seng ïa ka shnong ha katei ka snem.
Ïa ka jingïalang la pynïaid da ki ar ngut ki khun jong ka shnong kiba kynthup ïa u ma L. Lyngdoh bad kong R. Patlong.
Ha shwa ban sdang ïa ka jingïalang kala don ka jingpule Baibl bad ka jingduwai na u Pastor E. Nongpluh. La ïoh ïa ka jingkren pdiang na u ma J.M. Pohsngap. Ka jingkren lyngkot ïa ka History jong ka shnong na u wei na ki rangbah jong ka shnong u ma N.K. Lamare uba dei ruh u Chairman jong ka Souvenir Committee.
Hadien kane la ïoh ïa ka jingkren na u Symbud Kongsan ma J.K. Rymbai bad na u Kongsan ma F.W. Blah. Na ka liang jong ki, kila pynpaw ïa ka jingsngewkmen lem halor kane ka jinglah jong ka shnong ban jam sha une u maw mer ba 75 snem. Ki buh ruh ka jingkyntu ïa ki nongshong shnong ba don ka mynsiem jingïaieit bad ka jingïatylli, khnang ba yn lah shuh shuh ban ïalam shakhmat ïa ka shnong ha kine ki snem ban wan.
Na ka liang u kongsan ula plie ruh ïa u Maw sahnam (Tablet) jong ka shnong, katba u Symbud Kongsan ula plie pyrda ïa ka dur (Mascot) kaba dei ka dak jong ka jingrakhe 75 snem ka shnong.
U Kongsan ula sam ruh ïa ka khusnam jop sha ka samla Wansaka E. Hinge haka jingïakop shna dur Mascot.
Ha kane ka sngi la pynshit pynsyaid ïa ka jingrakhe da ka jingïashim bynta jong ki khun jong ka shnong naduh ki samla haduh ki khynnah lyngba ki jingrwai bad ki jingshad. La ïoh ïa ka jingot Cake Jubilee bad la duwai pynkyntang da u Pastor K. Syiemlieh.
ïa ki kyntien ai khublei la ai da u samla E. Suting uba dei u Secretary, Paltinum Jubilee cum Organizing Committee. U la pyntip ruh ba ha kine ki bnai ban wan kin sa don shibun kiwei pat ki prokram jingïakop bapher bapher kiba ka shnong kan pynïakhun, kumta u khot bad kyntu lang ïa baroh ki khun jong ka shnong ban ïashim bynta shitrhem.
Kum ka dak jong ka jingkmen kala don ruh ka jingpynher ïa ki Dingkum, katba ha ka por janmiet kala don ka jingpynbyrngia lyngba ki jingrwai da ki khun ka shnong.
