Shillong, Nailur 08: Sa shisien pat ka NEIGRIHMS ka la pynlong ïa ka East Zone Pediatric Nephrology Conference 2024 lyngba ka Department of Paediatrics, da kaba buh ïa ka thong jong ka ban ai ka jingshakri katkum kane ka juk stad kaba mynta kaba dei ruh ka bynta kaba kongsan bha ha kane ka por.
Da ka jingïalam u Dr. Himesh Barman, Professor bad u Head jong ka Department ryngkat bad ka kynhun jong u kaba kynthup ïa ka Dr. Rosina Ksoo, Associate Professor, bad Dr. Mampy Das, Assistant Professor, ki la wanrah ïa bun ngut ki stad bad ki riewshemphang kiba la ai jingkren halor ki mat kiba kongsan kiba ïadei bad ka jingpang Nephrotic Syndrome, Glomerulonephritis bad Urinary Tract Infections (UTI) nalor kiwei pat ki jingpang kiba donkam ban ïakren.
Ïa kane ka conference la plie da u Prof. (Dr) C. Daniala, Medical Superintendent ka NEIGRIHMS, uba la banjur ïa ka jingdonkam kyrkieh ïa ka Pediatric Nephrology Unit kaba kyrpang ha katei ka jaka sumar, da ka jingïohi jngai ban sdang noh ïa ka DM Residency Program ha ka Pediatric Nephrology ha ki snem 2019, kaba pyni ïa ka jingaiti jong ka NEIGRIHMS ban pynïar ïa ka jinghikai bad jingai jingsumar ha kane ka thaiñ shatei lammihngi.
Na ka liang u Dr. Anil Vasudevan na ka St. John’s Medical College, Bangalore bad Dr. Valentine Lobo na KEM Hospital, Pune, kila ai ka jingbatai kaba bniah halor ka jingkylla ka por ha katei ka liang, kynthup ïa ki Medical Genetics bad kila pynpaw ruh ha kaba ïadei bad ki jinglap kiba thymmai bad ka jingktah ka jong ki ha ka rukom ban ai jingsumar bad kiwei kiwei ki bynta.
La iathuh ba ki nongïashim bynta ki kynthup ruh ïa ki nonghikai jong ka Pediatric Nephrology na ki jylla bapher bapher jong kane ka thaiñ, kynthup ruh kum na ka West Bengal, Meghalaya, Assam, Orissa, Bihar, Jharkhand, Mizoram, bad Arunachal Pradesh.
La ong ba ki la don ruh ka jingïashimbynta shitrhem ha ka jingïakob kyntip, ka jingai ïa ki jingthoh bad ka poster session nalor kiwei pat ki prokram.
