Nongpoh, Nailar 24: Ka skul bah University of Science and Technology Meghalaya, kan sa pynkup burom da ka kyrdan Honorary Doctor of Literature ïa u Bah Lou Majaw u ba dei uwei naki nongrwai ba paw ka jylla bala tip paidbah ruh kum u Bob Dylan haka thaiñ Shatei Lam Mihngi halor u synniang u bynhei ba la kyntiew shibun eh ïa put ka tem bad ka rwai ka siaw ha ka jylla Meghalaya.
Ka Skulbah USTM kala rai ban pynkup burom ïa u Bah Lou Majaw naka jylla Meghalaya bad kumjuh ruh u Zubeen Garg na Assam haka 27 tarik Nailar 2024 kaba dei ruh ka 10th Convocation jong katei ka skulbah ban pynkup burom ïaki samla pule kiba la pass bad pyndep ka jingpule.
Ha katei ka sngi, u Lat ka jylla u C. H. Vijayashankar un sa leit ban shim bynta ban pynkup burom ïa u Lou Majaw bad ïa u Zubeen Garg na ka bynta ban pynkhamti ïa katei ka kyrdan ba la ai sngewbha da ka skulbah USTM ryngkat ki hajar ngut ki samla pule kiba la pyndep ïa ka kyrdan Graduate, Post Graduate bad Ph.D.
Kane ka jingioh pdiang u Bah Lou Majaw ïa katei ka kyrdan ‘Doctor of Literature ‘na katei ka skulbah, ka dei hi hadien ka jingwad bñiah katei ka skulbah, shaphang u synñiang u bynhei ba la synñiang da u Bah Lou Majaw ban kyntiew ïa ka put ka tem, ka rwai ka siaw haka jylla Meghalaya bala wanrah ruh shibun ki jingmyntoi haka imlang ka sahlang.
