Da ka ‘1st Turshaphrang Excellent Awards’ pynkup burom ka HYC Sawsymper Circle ïa ka Jessica Marweiñ

Mawkyrwat, ‘Naitung 14: Kum ka dak jong ka jingaimynsiem bad ai jingpynshlur ïa ki samla jong ka thaiñSawsymper baroh kawei, ka Hynñiewtrep Youth’s Council (HYC) jong ka Sawsymper Circle ka la ïoh ban pynlong ïa ka prokram pynkup burom da ka “1st Turshaphrang Excellent Awards” ïa ka Jessica Marweiñ kaba la ïoh ha ka kyrdan Top 20 ha ka Exam MBOSE 2023 St. Ferrendo Higher Secondary School, Sawsymper East Khasi Hills District.
Ha kane ka sngi, ka HYC Sawsymper Circle ka la ïoh ruh ban pynlong ïa ka jingïakop dro dur kaba ka phang ba ki la buh ka dei, “Natural Environment” bad ïa ki nongjop ha kane ka jingïakop dro dur la ïoh ban ai khusnam da ka syrnod bad ka song pisa bad la ai sngewbha ruh da ka Momento ïa ka Pearly Stone Academy Secondary School, Mawryngkang, East Khasi Hills District ha kaba baroh ki khynnah bha skul ki la pass baroh ne 100% ha ka Result jong ka MBOSE jong u snem 2023.
Haba kren ha ka jingïalang ba lyngkot, u bah George Lyngdoh uba dei u President jong ka HYC Sawsymper Circle ula pynpaw ka jingsngewkmem ba ki la don ki khynnah skul kiba la wan rah ïa ka nam bad ka burom ïa ka dong ka thaiñ kata ïa ka Jessica Marweiñ kaba la ïoh rung ha ka Top-20 ha ka result jong ka MBOSE kaba mynta u snem 2023 na ka St. Ferrendo Higher Secondary School, Sawsymper. Ym tang kata, ka burom ka leit ruh sha baroh ki Nonghikai kiba la treishitom ban ai ki jinghikai kiba paka na ka bynta ki khynnah skul khlem da kheiñ la ki long ki khynnah kiba stad ne kiba duna jingstad hynrei ki la ai kajuh ka jinghikai ba ki khynnah kin lah ban ïoh bat ïa kaei ba ki ki la ïoh hapoh ki kamra klas.
Shuh shuh u la ai ruh ka jingkhulei na ka bynta ka St. Ferrendo Higher Secondary School, Sawsymper kaba ha sien ba nyngkong hapoh jong ka thaiñ Sawsymper ba la ïoh ban pass bha baroh ki khynnah skul kaba long 100% ha ka results jong ka MBOSE. Namarkata, u la ai mynsiem ïa ki ba kum ki khynnah skul ki dang donkam shibun ban nang trei shitom shuh shuh nangne shakhmat namar ba kane mynta dang ka long tang ka jingsdang ïa kaba na ka liang ka seng ka ai khusnam. “Nangne shakhmat ngin dang ïai bteng ban pynlong ïa kane ka jingpynkupburom da ka ‘Turshaphrang Excellent Awards’ lada don kiba leh bha”, ong u bah George Lyngdoh.
Haba bynrap shuh shuh u la ong ba bun ki samla pule kiba la pass bha ha ki kyrdan bapher bapher ki kyntait ban trei hapoh ka jylla lajong bad kane ka pyndiaw mynsiem ïa ki kum ka seng. Namarkata, ki donkam ban kyntiew ïa la ka jong ka jaidbynriew ba ki donkam kum ïa ki khun samla khasi ba kin long kum ki ophisar, ki doktor, ki nonghikai kiba trei hapoh ka jylla khnang ba kiwei jaidbynriew kin nym ïoh long trai hapoh kane ka Ri Khasi ba ieid jong ngi.
Haba kren ha kaba ïa dei bad ka jingïakop dro dur jong ki khynnah, u la ai mynsiem ba kum ki khynnah kim dei ban kut tang hangne, hynrei ha kawei ka sngi kin lah ruh ban ïoh ïa shimbynta ha kylleng ki jaka hapoh ka distrik bad ka jylla hi baroh kawei. Namarkata, ka seng ka la tyrwa ba ka kloi ban ïarap ïa ki khynnah kiba don ka sap ha ka rukam dro jingdro jong ki ryngkat ka jingpyndonkam hok ïa ka sap ba ki ki don.
Ha ka jingkren jong u bah Arbok Kharjahrin, President ka HYC South West Khasi Hills District u la ong, “Ai ba kane kan dei tang ka sngi jong ka jingsdang bad kan ym kut noh mynta hynrei kan dang ïai bteng na uwei u snem sha uwei pat ryngkat ki jingaimynsiem lyngba ka jingpynkup burom ïa ki khynnah skul bad kumjuh ban pynlong ïa ki jingïakop-dro dur ha kaba ïa dei bad ka mei mariang, namar ka donkam kum ha kine ki juk mynta ban pynsngewthuh ïa ka jingkordor ka mariang.
“Ngi ïohi bad skhi ha kine ki sngi ïa ka jinglong jong ka mariang ha kaba ka la kylla shibun bad ngi ïoh mad ïa ka jingrang tyrkhong bad ka jingduna ha ka jinghap slap haba ïa nujor bad ki por ki snem ba la dep”, ong u bah Arbok. Kumta ban pynsngewthuh ba kumno yn lah ban ïa khun ban pynneh pynsah ïa ki dieng ki siej, ki lum ki wah, ka jingdro ïa ki dur jong ka mariang kam dei tang ban shu dro ban pynitynnad hynrei ki dei ruh ban da leh ruh da ki kam ban ïada ïa ka mariang.
Kumta u la ban jur ba ban kyntiew ïa ka jingnang jingstad bad ruh ïa jaidbynriew ki donkam ïa ka jingïatrei lang naduh ki nonghikai, ki kmie ki kpa, ki khynnah skul bad ym tang kata hynrei ki khynnah skul khamtam ki dei ban don ka mynsiem ban ïa khun ïa ki kyrdan kiba kham ha khlieh duh bad nym ailad ïa kiwei pat ki jaidbynriew ban ïoh ban shynshar hangne hapoh ka jylla Meghalaya namar sa tang katno lada ma ngi ngim don ka jingkitkhlieh ngin sa long kumba ka la jia ha ka jylla Manipur ha kine ki sngi ba mynta.
Ïa ka jingïalang ha kane sngi la pynïaid da u samla Francis Nongsiej bad la ïoh ruh ka jingkren na ka kmie jong ka Jessica Marweiñ ki nonghikai bad kiwei de ki ‘riew rangbah ha ryngkat da ka jingïadonlang ruh ki khynnah skul, ki paidbah bad kiba la shah khot sngewbha ha kane ka sngi.