Shillong, Kyllalyngkot 06 : Ka Meghalaya ka la khur ïa ka jingjop da kaba pynliem ïa ka Arunachal Pradesh da 226 ron ha ka lympung ïalehkai Ranji Trophy na ka plate group hynne ka sngi Palei ha ka jingïalehkai ha Anand, Gujarat.
U Arbin Singh, u la ïoh ban khur 5 wicket ai kamai 42 ron ha katei ka jingïalehkai first-class ha ka inning kaba ar jong ka Arunachal Pradesh da kaba pynkhyllem lut baroh ki wicket bad ai kamai tang 185. Utei u rangkawang bol spin kadiang ha ka inning kaba nyngkong u khur 3 wicket ai kamai 53 ron ha kaba u la pyndep da kaba khur 8 wicket ai kamai 95 ron.
Ka Arunachal kaba la tied biang ha kane ka jingïalehkai kaba khatduh ha ka jingkamai ba 12/3, ka donkam kumba 400 ron ban jop. Ki la pyrshang katba lah ban kynjoh sha katei ka thong hynrei ki khlem lah, ha kaba u Rahul Dalal u la khyrwit 96 ron shwa ba un shah pynhap wicket ha u Arbin.
U Suraj Tayam u kamai 35 ron katba u Ngurang Tana 13 ron hynrei katei ka jingkamai ron ka khlem ïarap ïa ka kynhun ban poi sha katei ka thong.
Ka Arunachal ka kamai 45 ron bad 50 ron ha ka jingduh noh san bad hynriew wicket, kaba la ai mynsiem shi katdei eh ïa ka kynhun jong ka Meghalaya ha kane ka sngi.
U Tayam u la shah pynhap wicket ha u Dippu Ch Sangma (1/17) bad u Tana da u Abhishek Kumar (3/29). U Dalal marwei u la hap ban ïakhun tyngeh ha ryngkat katto katne ki paralok hynrei ki khlem lah ban tied ïa ka jingkawang bol ba tbit jong u Arbin.
Da kaba jop saw sien na kiba bun ki jingïalehkai, ka Meghalaya ka lamkhmat na ka plate group katba ka Manipur ha ka kyrdan kaba ar. Ka Manipur kan aireng pyrshah ïa ka Meghalaya ha ka jingïalehkai kaba khatduh kaban sa pynïalehkai hangne ha Shillong naduh ka 10 tarik Kyllalyngkot.
