Nongpoh, Ïaiong 26: Ka FKJGP Umling Circle kala rah syndon ïaka nam lahduh haka lympung ïalehkai phutbol Inter Circle Knock Out Football Tournament bala pynlong da ka Federation of Khasi Jaintia and Garo People, North Khasi Hills District hadien ba kala lah ban pynliem noh ïaka Umden Circle haka jingïakhun phainal bala long ha ka 26 tarik Ïaiong ha madan NSCA, Pahamsyiem.
Ïa katei ka lympung la wan ban pynhap pyrda noh da u Bah Dundee Cliff Khongsit President ba rangbah ka FJKGP sengkmie, kum u kongsan haka jingdonlang u Samla Kitboklang Nongphlang Vice President, ki nongïalam naka North Khasi Hills District naduh u Bah Luistar Lyngdoh President, Bah Lumlang Mawnai Senior Vice President, Bah Ricky Majaw General secretary, Bah Jedwin Lyngdoh Rangbah Shnong ka Pahamsyiem, lem bad ki nongïalam naki Circle bapher bapher.
Haba phai sha ka jingïakhun phainal ha katei ka sngi hapdeng ka Umling Circle pyrshah ïaka Umden Circle, ka jingïakhun ka long kaba itynnad ha kaba baroh 2 tylli ki kynhun kila pyni ïala ka jong ka sap ka phong naka bynta ban khur ïaka nam jop ha katei ka lympung, hynrei hapdeng ka jingïakhun ba jur ka Umling Circle kala lah ban pynliem noh ïaka Umden Circle da 2-1 kol ban rah syndon ïaka nam lahduh jong katei ka lympung.
La sam ruh ïaki khusnam ha katei ka sngi ha kaba ka Umling Circle kala ioh ban rah ïaka song pisa kaba 20 hajar lem bad ka trophy katba ka UmdenCircle kala ioh ban khur ïaka song pisa kaba 10 hajar lem bad ka trophy.
