Da ka rukom tih dewïong ‘tunnel mining’ kyrpad u Myntri Rangbah na ka sorkar pdeng ban pyntreikam ha ka jylla

Shillong, Naitung 11 : U Myntri Rangbah ka Meghalaya, u Conrad K. Sangma, ha ka sngi Balang u la ong ba ka Sorkar Jylla ka la tyrwa ban pyndonkam ïa ka tunnel mining kaba kyrshan da ka teknoloji ba thymmai ha jaka jong ka open cast mining, da kaba kdew ba kan kham pynsuk ïa ki nongtih dewiong ha ka jylla.
Hadien ka jingïalang bad u Myntri ka Sorkar Pdeng ba peit ïa ka tnad Mining ha Delhi dang shen, u Conrad K Sangma u la ong ba ka jylla ka kwah ban bteng ïa ka tunnel mining hynrei da kaba pyndonkam ïa ki lad jingïada kiba katkum ka juk stad saïan mynta.
“Kumta, katkum ka jingkren jong ngi ka long ba lada shah ïa ka tunnel mining, dei ban leh da kaba pyndonkam ïa ki teknoloji ba thymmai kum ka 3D mapping ban ithuh ïa ki jaka kiba don jingma, ban buh ïa ki lynti ba ki nongtih kin lah ban rung da ka jingshngaiñ, bad ban tei ïa ki jingtei kiba pynskhem ïa ki par dewïong khnang ban lait na kino kino ki jingma,” ong u Sangma.
U la bynrap ba ki kor bad ki teknoloji kiba biang dor kiba la pyndonkam ha kiwei pat ki ri ruh lah ban wanrah sha Meghalaya.
“Lada lah ban wanrah ïa kine ki teknoloji bad pyntikna ba ki jingma kin ym dun shuh, kata ka long ka jingtyrwa jong ngi,” u la ong.
U Myntri Rangbah u la ong ruh ba ka open cast mining kam long kaba lah ban pyntreikam ha Meghalaya.
“Ha ka liang ka jinglut jingsep, ka open cast mining kam long kaba ïahap ïa ki nongtih dewïong jong ngi. Wat mynta ruh, don palat 22,000 tylli ki par dewïong ha kylleng ka jylla, bad kan long kaba eh bha lada ngim don ka rukom treikam kaba biang,” u la ong.
Haba kren shaphang ki kyndon ba la buh, u Myntri Rangbah u la ong ba ka kyndon kaba dawa ba ka jaka tih ka dei ban long 100 acre katkum ka MMDR Act kam ïahap satia bad ki nongtih dewïong ha ki jaka kiba rit. U la ong ba u Myntri ka Sorkar Pdeng u la mynjur ba ïa kane ka kyndon dei ban bishar biang.
“U la mynjur ba ka kyndon 100 acre kam long kaba lah ban pyntreikam ïa ki nongtih dewïong ha ka thain jong ngi, bad kumta dei ban bishar thymmai ïa ka,” ong u Conrad.
U la ïathuh ruh ba u Myntri u la bthah ïa ki ophisar jong ka Ministry of Coal bad ka Sorkar Meghalaya ban ïalang hapoh ki 10 sngi ban pynbeit ïa ka jingtyrwa.
“U Secretary ka Coal Ministry, u Additional Secretary bad ki ophisar ka Sorkar Meghalaya kin hap ban shong jingïalang ban ïakren bad pynbeit ïa kine ki mat,” u la ong.
“Ngi la kyrpad ba ïa ka bor hapoh ka Section 5(1), kaba ïadei bad ka jingai jingmynjur ïa ki kot ki sla bad ki mining plan, dei ban ai noh sha ka Sorkar Jylla lyngba ka bor kaba don hapoh ka Section 26,” u la ong.
U Myntri Rangbah u la ong ba lada lah ban pyntreikam ïa kane ka rukom jingïatreilang, kan long ka jingïoh jingmyntoi lang ïa baroh arliang.
“Lada kane ka rukom ka treikam, kan long ka jingïaid lynti kaba myntoi lang ïa ki nongtih dewïong ha ka thain jong ngi bad ruh ïa ka jingsngewkhia jong ka Sorkar India,” u la bynrap.