Jowai, Ïaïong 27: Ka SCA ‘B’ kala jop da 260 runs ïaka West Khasi Hills DCA haka jingïalehkai jong ka Under-16 Boys Inter District Cricket Tournament 2025 (Zone-1) kaba la long ha ka sngi Saitjaiñ 26 tarik Ïaïong.
Ïa kane ka lympung la pynlong daka Meghalaya Cricket Association (MCA) ïa kaba la pynïaid daka West Jaiñtia Hills District Cricket Association (WJDCA) ha Madan Thad, Mukhla Mission,West Jaiñtia Hills District.
Ka jingïalehkai ha kane ka sngi, kala long ka ba noh shiliang hapdeng ka SCA ‘B’ pyrshah ïa ka WKHDCA, ha kaba ka SCA ‘B’ ka la jop da 260 run. Ïa ka jingkynting toss la jop da ka SCA “B” kaba la kam trai ban tied shuwa. Ka SCA ‘B’ haba leit tied nyngkong kala kamai 322 na ki 50 overs bad liem 9 wickets.
U Suraj Chettri ula long u nongtied ba paw mynta ka sngi napdeng ki nongtied jong ka SCA ‘B’ da ka ba tied marwei 129 runs na ki 102 balls ryngkat ar tylli ki Six (6s) bad 14 tylli ki Fours (4s). U Ryan Wilson Malngiang ula tied 43 run na ki 56 balls bad u Ynsanhame Tang pat u la tied 43 runs (not out) na ki 28 balls.
U Pynshngainlang Marwein, u Phibanker Iawphniaw, u Pynskhemlang Nongsiej bad u Leadest Son Thongni, ki nongkawang ball jong ka WKHDCA ki la ïoh ban pynhap mar 2 wickets.
Ka WKHDCA ha ka pali jong ka ban beh ïa ka thong, ki nongtied jong ka ki la kyllon uwei hadien uwei na ka daw ka jingtbit palat jong ki nongkawang ball jong ka SCA ‘B’ bad ki lah ban tied tang haduh 62 runs bad hap lut baroh 10 wickets ha ka over kaba 24.5.
Napdeng ki nongtied jong ka WKHDCA dei tang u Pynshngainlang Marwein uba la ïoh 16 (37) bad u Atiar Bakynsai Myrthong 14 (34) kiba lah ban kamai run ar digit. U Ynsanhame Tang bad u Bankhrawbor Khongjee, nongkawang ball jong ka ka SCA ‘B’ ki la ïoh ban khyrwit mar 2 wickets.
Ka jingialehkai ha ka sngi Monday 28-04-2025 kan long hapdeng ka SCA ‘A’ pyrshah ïaka EJHDCA naduh ka por 8 baje shiteng mynstep.
