Col CK Nayudu Trophy: Pynthikna ka Meghalaya ban rung semi final da ka namjop ïa ka Arunachal

Shillong, Rymphang 01: Watla sah sa shi sien ïakhun ha ka thup round robin, ka kynhun ïalehkai kriket jong ka Meghalaya ka la dep pynthikna ïalade ban ïakhun ha ka semi final da kaba jop baroh saw sien lynter ki jingïakhun ha ka lympung U-23 men’s Col CK Nayudu Trophy, ha kaba hynnin ka Sngi Balang ka la pynliem ïa ka Arunachal Pradesh ha madan kriket MCA Ground, Polo.
U Abhishek Kumar u la lah ban tyngshaiñ bha ïalade ha ka bol ban ïarap ïa ka Meghalaya ban jop suk da 180 ron ïa ka Arunachal Pradesh hynnin ka step jong ka sngi ïakhun ba saw hapdeng kine ki arliang mamla.
Hadien ba u la khur 5/41 ha ka inning tied ba nyngkong ka Arunachal bad 6/57 ha ka inning kaba ar, u Abhishek u la pyndep ïa baroh ki inning da kaba khur 11/98, kaba dei kawei na ki jingïalehkai kaba seisoh na bynta jong u bad ruh ïa ka kynhun.
U Manish Sharma (2/9) u la ïoh ban pynhap ïa u wicket ba khadduh, lyngba ka jingïarap u Bipin Kumar Ray u ba la ïohkem ïa ka bol shuwa ba kan hap ha madan.
Ka Meghalaya ka dang hap ban pyndep ïa ka round robin, bad yn aireng khadduh ïa ka Nagaland hala ïing ha ka 4 tarik Rymphang.