Shillong, Kyllalyngkot 09: Ka jinglah ban lehkai bha u wei na ki rangkawangbol ka Jylla, u Manish Sharma ka la ïarap ïa ka Meghalaya ban jop kput haduh 328 ron ïa ka Sikkim. Haba phai sha ka jingïalehkai, u Manish Sharma u la lah ban tyngshaiñ da kaba khur haduh 8/14 naki 15 over kiba u la kawang ban khur ïa ka jingjop na kane ka jingïalehkai jong ka lympung U-23 men’s Col CK Nayudu Trophy kaba long ha Rangpo, Sikkim, hynne ka Sngi.
Haba kyllumlang ïa ki 6 wicket ha ka inning kaba nyngkong, u Manish mynta u la khur haduh 14 wicket na kane ka jingïalehkai pyrshah ïa ka Sikkim- kawei na ki jingïakhun ba ka Meghalaya ka la tyngshaiñ ha ka bowling.
Haba phaidien, ka Meghalaya ka la shah pynkut da 113 ron ha ka Inning tied kaba nyngkong bad ka Sikkim ka la shah pynkut da tang 91 ron hap baroh ki wicket (all out) shuwa ba ka Meghalaya kan buh ïa ka thong haduh 370/9 shuwa ban kut ka sngi ïakhun ha ka Lah Sngi U Blei ha ka Inning tied kaba ar, kaba la pynlong ïa ka Jylla ban ïoh lamkhmat da 392 ron shuwa ba ka Sikkim kan shim ïa ka pali tied ha ka inning kaba ar.
Ka spah ron na u Kevin Christopher ka la ïarap ïa ka Jylla ban kynjoh sha ka 300 tam, hynrei ka Sikkim kam shym la lah ban pynjan ïalade bad katei ka thong ba la buh- kata 393 ron ban jop ha kaba ka la shah pynkut noh da tang 64 ron na ki 40.5 over. Tang arngut ki rangtied ka Sikkim kiba la lah ban kynjoh sha ka phew ron.
U Manish u la lah ban ïaid lyngba ki wicket jong ka Sikkim khlem jingsalia, da kaba pynhap wei hadien u wei. KI arngut ki wicket kiba u khlem shym la ïoh pynhap la khur da u Aryan Borah (1/18) bad u Abhishek Kumar (1/31).
Ka Meghalaya mynta kan leit sha Gujarat ha kaba kan sa kynduh pyrshah ïa ka Manipur ha ka prokram ïakhun kaba wan, ha ka 14 tarik mynta u Kyllalyngkot ha Surat.
