Shillong, Kyllalyngkot 09: Ka kynhun ki nongïalehkai Wushu kiba mihkhmat ïa ka jylla hapoh ka lama Meghalaya Wushu Asso ciation (MWA) kiba kynthup ïa 17 ngut ki nongïalehkai (WOMEN) ki la wanrah nam ïa ka jaitbynriew hadien ba ki la wanphai na ka East Zonal Khelo India Wushu Women’s Leaque ryngkat bad ki takma.
Ka kynhun jong kine ki 17 ngut kiba la leit ban mihkhmat ïa ka jylla ha katei ka rynsan la ïalam da u Bah Donny R. Ranee-President MWA, ka Kong Lorenza Songthiang kum ka Team Coach bad ka Kong Jessica Kharumnuid kum ka Team Manager.
ïa kane ka East Zonal Khelo India Wushu Women’s Leaque la pynlong ha Assam, Kokrajhar kaba la sdang naduh 3 tarik kaba kut haduh 6 tarik u Kyllalyngkot, 2024.
Ka Meghalaya ka la ïoh ban khur kawei ka takma rupa bad 5 tylli ki rnong na katei ka lympung.
Ka takma rupa ka dei ba la jop da ka Hammylienki Dkhar ha ka thup Sanshou event 52 kg, katba ka Sesilia Dkhar ka la jop takma rnong ha ka thup ïalehkai 45Kg Junior (baroh arngut ki dei na East Jaintia Hills District), ka Rijanai Ryndong ka la khur takma ha ka thup 48 kg Junior, ka Ibalakordor Umdor ka la khur takma na ka 70Kg Senior ( baroh arngut ki dei na East Khasi Hills District) bad 2 tylli ki takma rnong ha ka Taolu Event Changquan la khur da ka Balakynshew Lyngdoh na Ri-Bhoi District bad kawei ha ka Tai-Chi Quan la khur da ka Espiranza Songthiang na East Khasi Hills District.
Ka long shisha ka jingjop ïa ki nongïalehkai ka kynhun Wushu ka Jylla ba napdeng ki 17 ngut ki Athlete kiba la ïashimbynta ha kane ka Women’s Wushu league khyndai nngut ki la kiew kyrdan sha ka thup Top 8 bad ki la ïoh jingbit ban mihkhmat ïa ka East Zonal Khelo India na Meghalaya sha ka lympung All India Khelo India Championship ka ban sa long shen mynta u snem, 2024.
