Shillong, Kyllalyngkot 09: Ka kynhun ïalehkai jong ka Shillong Lajong FC kan sa sdang ïa ka lynti ïaid jong ka ha ka lympung Kalinga Super Cup 2024 pyrshah ïa ka kynhun ba ïakhun ha ka ISL, ka Kerala Blasters FC mynta ka sngi ka 10 tarik u Kyllalyngkot, 2024.
Ka jingïakhun hapdeng kine ki ar kynhun kan sdang ha ka por 2 baje nohphaisngi ha Kalinga Stadium, Pitch 1, Bhubaneswar.
Ka kynhun ka la shah pynhaplang ha ka Group B ryngkat bad ka Kerala Blasters FC, North-East United FC, bad ka Jamshedpur FC. Kane kan dei ka jingïalehkai kaba nyngkong ïa ka Lajong mynta u snem hadien ka shuti tlang naduh ka jingïalehkai ba khadduh pyrshah ïa ka Namdhari ha ka 23 tarik Nohprah jong ka lympung I-League.
Na bynta ka Lajong, kane kan nym long ka jingïakhun kaba suk ha kaba ka hap ban aireng pyrshah ïa kawei na ki klob ba khlaiñbor jong ka ISL. Kane ka dei ruh ka sien kaba nyngkong ïa kine ki ar kynhun ban ïakynduh pyrshah ha ka ki lympung lehkai jong ka Indian football.
Kane ka lympung ka long ruh kabu ym tang ïa ki klob ISL hynrei ïa ki kynhun ba ïakhun I-League ki ban ïaknieh ïoh rah ïa ka khusnam nongjop, ha kaba ka kynhun ba rah namlahduh kan pynthikna ïalade ban ïoh ïakhun ha ka 2024 AFC Champions League-2 Group.
