Shillong, Kyllalyngkot 09: Ka jingïalehkai jong ka lympung SSA 1st DIVISION Football League 2023-24 ba la sdang hynne ka sngi ha madan SSA Ground ka la jam sha kaba kut ha kaba ka kynhun Laitkor SC ka la khur ïa ka jingjop.
Ka jingïakhun kaba la long hapdeng ka Laitkor SC pyrshah ïa ka Malki SC la sdang ha ka por 2:15 nohphai-sngi. Lah ban kdew ba ka jingïakhun ka la long kaba itynnat bad kaba ïakhaid, naba ym shym la don ba lah thep ha ka kylla kaba nyngkong.
Ka jingïakhaid ka la neh shi slem tad haduh ynda la jam sha ka 70 minit ba ka Laitkor SC ka la lah ban pynïakhlad lyngba ka kol na u Ryngkat Yanni Rangksai. Kane ka shi kol ka la neh haduh kaba kut jong ka por kaba la ai jingjop ïa ka kynhun.
Mynta ka sngi yn sdang pat ïa ka lympung Under-16 Boys Football League 2023-24, bad ka jingïakhun ka ba nyngkong kan long hapdeng ka Lumshyiap SC pyrshah ïa ka Upper Shillong Colt (por 9:30 baje mynstep), bud sa ka jingïakhun hapdeng ka Umphyrnai SC pyrshah ïa ka Umpling SC (por 11 baje mynsngi), bud sa ka jingïakhun jong ka Merinda FC pyrshah ïa ka Lah Bet SC bad khadduh ka jingïakhun hapdeng ka Rangdajied United FC pyrshah ïa ka Mawpat SC.
