Shillong, Kyllalyngkot 09: U Myntri ka tnat ïalehkai jong ka sorkar Jylla (Minister of Sports and Youth Affairs), u Bah Shakliar Warjri hynne ka sngi ha nongbah Shillong u la thang ïa u Donmusa ha SSA Stadium shuwa ban sdang plie ïa ka 5th Meghalaya Games ban rah pat sha Tura, West Garo Hills, ïa kaba kane ka Games kan sa long naduh 15-20 tarik mynta u Kyllalyngkot 2024.
Haba ai jingkren ha katei ka jingïalang, uMyntri ka tnat ïalehkai, Bah Shakliar Warjri u la pynpaw ïa ka jingkmen ban lam lynti ïa ka jingpynlong ïa ka Meghalaya games da kaba thang ïa u Dongmusa kaba la aiti sha ki nongpynïaid kane ka Games. U la ong ba ka Meghalaya Games ka dei kawei na ki rynsan ïalehkai kaba heh hapoh ka Jylla; u la kitbok kitrwiang ruh ïa ki nongïalehkai na man ki district ki ban sa shim bynta ha ki jingïalehkai bapher bapher mynta u snem.
Shuh shuh u la pynsngew ba na ka liang jong ka sorkar ka la trei shitom ban kyntiew kham shaphrang ïa ka Sports bad ruh ban pynshlur ïa ki samla ban tyngkai bha ïa la ka jong ka sap kaba maki ki don bad ruh na bynta kane ka Games ban long kaba seisoh.
“Ka sorkar ka la trei shitom ban pynthikna ïa kane ka rynsan kaba seisoh bad kyrmen skhem ba kan long kawei na ki rynsan kaba jop. Lyngba kane ka rynsan ïalehkai ka Sorkar ka kyrmen ba kin don ki nongïalehkai (athlete) ki ban tyngshaiñ ha ki bynta ba ki ïakhun, da kaba khmihlynti ruh ïa ka lawei ba kin sa ïoh ïashimbynta ruh ha ki kyrdan ïalehkai National level, International level kum ka Olympics,” u la ong.
U la bynrap ruh ba ka thong kaba hakhmat jong ka sorkar ka long ban pynbit pynbiang ïa ki jingtei ban kyrshan bad kiba lah ban nang pynjanai shuh shuh ïa ki athlete bad ruh ban pynshlur ïa ki ban shimkhia ïa ka rynsan ïalehkai kiba ki mihkhmat ym tang ban shu lehkai ban pyndep ïa ka kamram.
U Myntri ka tnat sport u la kren shai ruh ba da kaba pynlong ïa ki rynsan ïalehkai kan ïarap ïa ki samla ban lait na ka jingsniew u drug. Ka Meghalaya Games, kaba dei ka rynsan bad ka kabu ïa ki samla ban sei madan ïa la ka jong ka sap.
