Ha ki 20 bad 30 snem mynshwa ban ïoh ïa ka Laisen ñiah kali ka long kaba jynjar haduh katta katta namar ki ophisar kiba dei peit ïa ka District Transport Office (DTO) ki long kiba pyrkhing bad kim ju ailad satia da lei lei ruh ba ki paidbah kin ïoh ïa ka laisen lada kito ki nongwan pan kim pat lah bha ïa ki kyndon ñiah kali lane kim pass bha ïa ka interview.
Nalorkata, wat hadien ba kito kiba wan pan laisen ki la nang ban ñiah ïa ka kali hynrei lada kim pat tip pat ïa ki jingkdew (signal) bapher bapher kin hap shwa ban lah lyndet bad hadien ba la pyntikna ba ki la lah shisha, kin sa ïoh ïa ka laisen, kata ruh khlem da donkam BAISHA.
Hynrei ka long kaba sngewsih ba ha kane ka pateng ba mynta, don ruh kiba ïoh laisen kiba tang ka kali ruh kim pat nang ñiah bha. Hato balei kine baroh ki jia?. Lehse dei namar la suk palat ban ïoh ïa ka laisen tang namar ba biang ka BAISHA (kaba ki ju ong hynrei kaba palat pat wat ïa ka bai bam shibnai) kaba ki ju pynkham ha kito ki ‘dalal’ kiba ju don ha ki phyllaw jong ki DTO.
Kaba kham i ma eh ka dei ba bun ki draibar kim ithuh ïa ki zebra crossing lane ki jaka ba la ruid bha ha pdeng surok bah na ka bynta ki paidbah ba kin kam sha shilliang. Kane kam jia tang ha nongkyndong hynrei ka khamjur pynban ha nongbah Shillong. Man ka sngi naduh ki riew paidbah haduh ki nongtrei ophis kiba don ha ki bynta jong ka Additional secretariat bad ruh ha Main Secretariat ki hap ban ap slem slem ban ïoh kam sha shilliang tang na ka daw ba ki draibar kim ithuh ïa u zebra crossing.
Ki don ruh ki khep ba ki paidbah ki la thmu ban kam sha shilliang hynrei ka jingbym ithuh jong ki draibar ïa kitei ki jingkdew, ki paidbah ba pli ki la hap ban kynthih biang shadien da ka jingtieng ïoh mynsaw ei khamakha. Ka jingbym teh pyrkhing ha ka rukom ai laisen kadei ruh ka dawbah ba ka tnad pulit ka kynduh jingeh bha bad kane kadei ruh ka dawbah kaba pynlong ïa ka jingdheng kali ha kiba bun ki jaka namar bun kim pat tip satia wat tang ïa ki kyndon ba hap ban burom ne ailad ïa ki nongïaid lynti lyngba kitei ki Zebra Crossing.
Hato haduh katno kein ki pulit pynïaid kali kin don por ban hikai naduh A-Z ïa ki nongñiah kali ba kin tip ïa ki kyndon ñiah kali baroh. Katei hi ka pawshai ba na ki DTO ki shu ai pathai ïa ki laisen kaba poi haduh u pud ba ki nongñiah kali kim tip shuh wat ïa kaei ka bym dei ban leh bad kaei kaba kidei ban leh haba ki don ha kali.
Lah ban ong ruh ba dei na ka dawe ka jingai laisen pathar ba ki pulit ka nongbah dang ha ki snem ba la lah ki la buddien ïa ka bamsap ha ka ophis District Transport Office bad pynpaw pyrthei syndon ïa ka jigdonkti lang ki nongtrei jong ka bad kito ki dalal ban pynïoh laisen, permit bad kiwei kiwei.
Ka la dei ruh ka por ba ki heh pulit ka Jylla kin treilang bad ka Transport Department khnang ban teh lakam ïa ka rukom ai laisen khnang ba kito kiba pan kin hap ban da pynbiang tikna thik pa thik ïa ki jingdonkam baroh shwa ba kin ïoh. Namar la ju ïohi ruh na ka por sha ka por bad lah ban ong ba ka jia ruh jan man ka sngi ki pulit ki ju ïoh dain kuna ïa ki kali. Lada dei ba ki tip aiñ lehse katei kan ym jia.
Ka tnad pulit kumjuh ka ophis Transport lyngba ki ophis DTO ki la dei ban tohkit ruh la ka jingbun ki jingjia aksiden kiba jia kylleng kylleng ïoh ki lah ban dei na ka daw ba kito ki draibar ki dei ki bym pat biang ka jingtbit ban ñiah kali.
