Byrngem tur Shillong ki nongshet ja skul sha Nongbah Shillong ba ïai mynthi ka sorkar ia ki mat jingdawa

Jowai, Jymmang 21: Ki nongshet ja sngi kiba don hapoh ka lama jong ka All Jaiñtia Mid Day Meal Worker Union (Central Executive Committee) mynta ka sngi kila shim ïa ka rai ban leit shah thngan da kaba jai jai ha nongbah Shillong ha kane ka 31 tarik u Jymmang 2022, naduh ka 9 baje step haduh 5 baje janmiet.
Kane ka jingshah thngan ka long shi bynta na ka jingdawa jong ki “ban pynkiew ïa ka bai nong naka 1000 tyngkat sha ka 5000 tyngka bad kumjuh ruh ban kyntiew ïa ka bai nong jong ki na ka 10 bnai sha ka 12 bnai ha ka shisnem”.
Ki nongsheh ja sngi kiba dei na ka West bad East Jaiñtia Hills District mynta ka sngi kiba pynlong ïa kane ka jingïalang ha Dorbar Halls jong ka shnong Loomïongkjam, Jowai na ka bynta ban ïakren halor ki jingeh kiba ki ïa kynduh naka por sha ka por kum ki nongshet ja sngi ha ki skul ne kaba ki khot mynta ka ‘PM POSHAN’ skim.
U ma Khroo. L. Parait ha ka jingkren bad u Mawphor ula ong “ngi la khot khang ïa kane ka jingïalang ka long hadien ba la kut ka jingai por jong ki ïa ka sorkar mynta ka sngi 21 tarik u Jymmang 2022 ban pynlait noh ïa ka bai nong kaba dang sah naduh u bnai November 2021 haduh u April 2022.
Hadien ka jingïakynduh jong ki hynnin ka sngi bad u Dr. B.D.R Tiwari, IAS, Commis sioner Secretary ka tnad pule ka sorkar jylla bad u Ambrose Ch Marak, IAS, Secretary Education kiba la ong na ka liang ka sorkar kan sa pynlait shen ïa katei ka bai nong ba dang sah jong baroh ki Mid Day Meal hapoh ka Jylla. Shuh shuh kila ai jingmut ba ïa ka pisa dei ban pynpoi beit ha ki bank Account jong ki nongshet ja hapoh ka Laskeiñ bad Tnadlaskeiñ kumba leh ha baroh kawei ka jylla.
Ula ïathuh ba ka daw ba la pynlong ïa ki ban shim ïa ka rai shah thngan ka long halor kine ki nongrim kaba nyngkong ka long ba ka sorkar kam shem la siew tikna ïa ka bai nong (honorarium) bad kaba ar ban pynkiew ïa ka bai nong katkum ka jingdawa. Kumta u kyntu ïa baroh ki nongshet ja sngi haki skul kiba don hapoh ka jylla ba kin wan ïashim bynta lang sha kane jingshah thngan kaba sngi sngi, khnang ba ka ophis u myntri rangbha ka sorkar kmie bad kum juh na ka sorkar jylla ba kin shim khia mardor ïa ka jingdawa.
Kaba sngewsih ka long haduh kine ki sngi ki nongshet ja sngi ha ki skul hapoh ka jylla ki dang pyndonkam da ki dieng ban shet ban tiew ha ka jaka ban leh da ka Gas namar ïa kane ruh kila dep ban ujor naduh u snem 2019 shi bynta ban lait na ka jingpom pathar ïa ki dieng.
Na ka liang ka kong Phiyooris Syngkon kaba dei ka President Laskeiñ Block kala ïathuh ba hadien ka jingïa kynduh bad ki briew ka sorkar hynnin ka sngi la pyllait noh ïa ka bai nong kaba lai bnai kata jong u November 2021, bad u bnai February, March 2022.
Ka kong Rihun Langshiang Secretary Amlarem Block Unit ka pynsngew kum ki nongshet ja ha ki skul ki buh ka jingkyrpad kaba jur khamtam ïa u myntri ka tnad pule puthi jong ka sorkar jylla ma Lahkmen Rymbui ba un shim khai ïa kane ka jingdawa khang ba yn nym mih kino kino ki jingeh hadien habud.