Byrngem ka JNC ban tur sha Secretariat lada ym jubab ka sorkar halor EIA be-aiñ ka Shree Cement

Khliehriat Jymmang 08: Ka Jaiñtia National Council Central Executive Committee (JNC-CEC) ka buh ïa ka jingmaham kaba shai bad kaba khatduh hakhmat ka sorkar Meghalaya ba lada ka seng kam ïohpdiang ïa ka jubab kaba thikna halor ki mat kiba ïadei bad ka jingpyrshah ka seng ïa ka Company Shree Cement Ltd, ka seng kan pynjur ïa ka jingïakhih da kaba tur paidbah sha Meghalaya Secretariat, Shillong ryngkat ka jingïashim bynta lang ki paidbah bad ka seng ka la ai por ïa ka sorkar haduh ka 15 tarik mynta u bnai Jymmang 2026.
“Ngim dei ka kynhun kaba thoh shithi bad buh jingthoh bad kut tang kumta, hynrei ngi dei ka sur jong ka jaitbynriew kaba kren bad leh eiei ruh na ka bynta ka khyndew ka shyiap, ki um, ki khlaw, ki btap bad ka hok jong ka riti synshar ka jong ng. Ka jingbishar paidbah la buh ha ka 22 tarik u Naitung 2026 bad ngin sa peit aiu ba ka sorkar kan leh halor kane, ngin ym shong kli kti katba ki kompeni nabar ki dang shim ïa ka hok bad ka jaka jong ngi, la thaw bad la saiñdur ïa ka JNC ban long ka sur jong ki briew jong ngi, bad kumta hi ngin long,” ong u kyrwoh na ka JNC.
Shuh shuh u President Rangbah jong ka Jaiñtia National Council JNC Central Executive Committee u bah Sambormi Lyngdoh u la ong, “Ka JNC ka kylli, ryngkat bad ka jingthoh ba pura Kumno ka EIA Meghalaya ka lah ban pdiang bad pyntreikam ïa ka kot EIA kaba la thoh shai kaba da kawei ka bor synshar jong ka Gujarat? Naduh mynno ka Sorkar Meghalaya ka pynlong ïa ki jingpynsngew paidbah na ka bynta ka Gujarat? Kane kam dei ka jingkynnoh hynrei ka dei kaba la thoh shai hi ha ka kaiphot ne report jong ka shree cement limited, ïa ka plan jingïada jong ka par mawshun la tei halor ka aiñ kaba la ïap, ka EIA ka pynbna ba ïa ka jaka jong ka projek ka hap hapoh ka Seismic Zone VI da kaba pyndonkam ïa ka Indian Standard, hynrei ïa kane ka aiñ ka Bureau of Indian Standards ka la weng noh da kaba pynbna ïa kane lyngba ka jingpynbna ba la pynmih ha ka Gazette of India ha ka 3 tarik u March 2026. Ka Seismic Zone VI ka la sangeh noh ha ka aiñ jong ka ri India ha katei ka tarik. Ka Shree Cement ka la ai ïa kane ka EIA ha ka 07 April 2026, 35 sngi hadien kata ka jingweng noh. Kumno lah ban ailad ïa ka kompeni ban pynlong ïa ka jingbishar paidbah ha kaba ïa ka Disaster Management Plan ban iada ïa ka jingim bad ki jaka jong ki briew jong ngi la thoh ha ka aiñ kaba ka Sorkar India hi ka la dep pyndam noh?”
“Ka JHADC kam shym la don satia ha baroh kane ka EIA. Ka Jaiñtia Hills Autonomous District Council kaba bat ïa ka bor synshar katkum ka riti synshar halor ka khyndew ka shyiap bad ki marpoh khyndew ha kane ka distrik hapoh ka Khyrnit kaba hynriew jong ka riti synshar ka ri India. Katba Ka kyrteng jong ka pat kam paw ym ha kano kano ka bynta, Ka buffer zone jong kane ka par mawshun ka long 98.79% Scheduled Tribe population, katkum ka EIA Jong ki hi. Ka JNC ka kylli Kumno ka JHADC ka shu sngap jar? Ka jingsngap jar jar jong ka JHADC ka mut aiu ïa ka hok riti synshar jong kawei pa kawei ka longïing riewlum ha Elaka Nongkhlieh?” ong u kyrwoh na ka seng.
“Ngi i ruh ba ka sorkar Meghalaya, hapoh ka jingpynbor jong ki paidbah, dang shen ka la mynjur ban weng noh ïa ka Lumpongdeng Island na ka projek Taj Resort ba la thmu ha ka pung Umiam.Ka JNC ka kylli ïa kane kajuh ka sorkar Ki paidbah ka Elaka Nongkhlieh, East Jaintia Hills, hato ki kham don hok ban ioh ïa kata kajuh ka jingburom? Kan eh aiu ban weng ïa kane ruh? Lada ka sorkar ka lah ban pynduh noh ïa kawei ka bynta jong ka projek Taj Resort namar ba ki nongshim bynta ha ka thaiñ ki la pynpaw ïa ki jingsngewkhia, te ka sorkar ka dei ban leh mar katjuh ïa ka projek tih mawshun ha kaba ïa ka EIA la phah sha ka bor synshar jong ka Gujarat, ka shaniah ha ka aiñ jingiada kaba la weng noh, bad ka iehnoh bein ia ka riti synshar jong ka distrik riewlum baroh kawei”
Ka JNC ka pynpaw ruh ïa ka jingsngewsih kaba khraw namar nduh ba wan ka Shree Cement ka la pharia ïa ki Paidbah ka thaiñ, khamtam eh ïa ka Elaka Nongkhlieh. Ki nongrep kiba la ieng ban iada ïa la ka jong ka khyndew ka shyiap kim lap ïa ka jingsngap na ka sorkar. Ha ka jingbishar paidbah jong u snem ba la dep na ka bynta ka karkhana Shree Cement ha Daistong ha u 2025, la khanglad ïa ki nongshong shnong tynrai ban rung sha ka jaka bishar ne jaka long public hearing la khanglad da ki briew shimet kiba leh na ka bynta ka jingmyntoi jong ka kompeni, da kaba pyndonkam da kita ki gunda ki mafia jong ka. Ngi la iohi ia kane ka kompeni ba ka trei ryntih ban pyniakhlad ïa ki shnong ki thaw jong ngi, ka leit sha ki nongialam shnong, ka pyndonkam bakla ïa ki bor synshar shnong, bad ka pyrshang ban khanglad ïa ki kam jong ki sengbhalang ha ki jaka ba ki wad ban treikam. Kane hi kan sa wanrah ka jingma ba khraw hadien habud ïa ki briew jong ngi. Ha ka Sngi u woh Kiang Nangbah, 30 tarik 2025 – ka sngi ba kyntang ban kynmaw burom ia u Khlawait ka ri, ka JNC ka la kular paidbah ban ieng tylli na ka bynta ka jaitbynriew Jaiñtia. Kata ka jingkular ka ieng skhem haduh mynta, bad ngim ailad ba kine ki briew ba nabar kin iuhroit ïa ka hok Jong ngi,” pynkut u kyrwoh na ka JNC-CEC.