Shillong, Jymmang 08: Ka HYC Sohïong Circle ka la aipor shi taïew ïa uwei u Rangbah uba kyrteng u Bah Belan Nongbri halor ki jingkynnoh ba ka seng ka long maw jynthut ne ba ka pyrshah ïa ka jingpyntreikam ïa ka Greater Sohïong Water Supply Scheme bad kumjuh ruh ïa ka Tnat PWD Roads National Highway Shillong Division ba kan ujor da ka FIR halor ka jingjah klep jong ki 842 tylli ki Delineator tang mar ïadep shna ïa ka surok Shillong Nongstoiñ National Highway.
Haba kren sha ki lad pathai khubor u President ka Circle u Samla Purningstar Shabong bad u General Secretary u Hamarbamut Thabah ki la ong ba ka seng kam ju pyrshah ïa kano kano ka skhim kaba wan hapoh ka thaiñ Sohïong hynrei kaei kaba ka kam jong ka kadei ban leh kan long na ka bynta ka jingbha jingïaid beit ka kam na ka bynta baroh ki nongshong shnong khamtam halor ka umbam umdih kaba dei ban poi ha thaiñ Nongkseh, Lait Nongkseh bad hapoh ka Shnong Khlaw thup thup ha kaba la kynnoh ruh ba ka jingïasoi soskular ïa ka skhim um la leh tang bad kawei ka kur ym pat bad ki nongshong shnong.
Haba phai sha ka jingshah kynnoh ba ka HYC ka pyrshah ïa ka skhim um, kitei ki nongïalam ki la ong ba kim pyrshah ïa katei ka skhim, hynrei ka seng ka shu peit ba ki skhim kiba wan ha ka thaiñ dei ban long kiba ïaid beit ïaid ryntih bad kaba ai jingmyntoi ïa u nongshong shnong.
Ki la ïathuh ba hapoh ka Wah Nongkseh ka jingpynbiang ïa ka um kam long kaba ryntih bad hadien ba la jurip la dawa na ka sorkar lyngba ka PHE ban pynbiang ïa ka um bad ïa ka jingeh ruh ba mad hapoh ka Shnong Lait Nongkseh bad kino kino ki kam ba ka seng ka shim hapoh ka shnong kan dei na ka bynta ka jingbha jong u paidbah.
Halor ka jingjah noh jong ki Delineator ki nongïalam ka seng ki la dawa na ka PWD Roads ba kan ujor noh da ka ejahar khnang ban lap ïa kiba donkti pynjah ïa kine ki tiar kiba kongsan bha napoh ka surok.
“Namar katkum ki daw ba la pynshai da ka PWD la ong ba ki la jah, ki la shah rat ha ki kali, ki la shah tuh ne don kiba la shah phut ne shah bret, kumta kane ka jingpynshai kam long kaba hun, kumta ngi dawa na ka PWD ban ujor da ka Ejahar ban shai lang baroh,”
