Plie pyrda ka Jowai Polytechnic ïa ka jingrakhe dap 25 snem

Jowai, Jymmang 08: Ka Jowai Polytechnic kawei na ki shlem ai jinghikai ïa ki samla pule ka jylla haka laiñ (Diploma) mynta ka sngi 8 tarik u Jymmang, 2026 kala plie pyrda ïa ka jingrakhe dap 25 snem ne ka ‘Silver Jubilee Celebration’ ha ka jingïalang bala pynlong ha phyllaw jong katei hi ka jaka pule.
Ha kane ka sngi u Myntri ka tnad Pule puthi, Revenue and Disaster Management, Information & Public Relations & Law ka sorkar jylla Lahkmen Rymbui ula long kum u kongsan, ha ka jingdonlang u symbud kongsan ma Wailadmiki Shylla uba long ruh u myntri ka koit ka khiah bad ka kam ïalehkai Sport ka sorkar jylla, nalor u Deputy Commissioner ka WJHD u Abhinav Kumar Singh, ki ophisar, ki nonghikai bad ki samla pule.
Ha kane ka porkram u kongsan ha ryngkat u symbud kongsan kila plie ruh ïa u mawnongrim ban tei ïaka Madan Synthetic Futsal bad ka Basketball Court haka jingmang pisa kaba 2,27,38,100.00/- tyngka. Kumjuh ruh la plie ïa Academic Buildng Annex jong ka Jowai Polytechnic, Jowai kaba la dep ban tei thymmai.
Haba ai jingkren ula ong ka jingnang jingstad ka long kaba donkam eh ha ka jingim briew bad ki don shibun ki jingnang jingstad kiba lah ban ïoh ha kiba bun ki liang naduh ki General Education, ki Technical Education nalor kiwei kiwei de, katba ki samla pule kiba ïoh jinghikai nangne kin ïoh jingtip ha ryngkat ka Practical.
Shuh shuh ula ong ka jylla hapoh ka jingïalam u Conrad K. Sangma kala wanrah ïaki lad jingïarap bapher bapher sha ki samla lyngba ki rynsan, kum ki samla ki dei ban shim kabu bad ban kyntiew ïaka jylla bad ban pynthymmai ïa ka jingtip katkum ka jingdawa ka por.
Ula pyntip ka sorkar jylla ka la sdang ïa ki laiñ pule bapher bapher kum ki Engineering College, State University, Medical College bad Architecture College, wat hapdeng ki jinglut ban siew pisa sha ki nonghikai ha kylleng ki College hapoh ka jylla hynrei ka sorkar ka la pyrshang ban pynïaid katba lah ban pyndap ïa ki jingdonkam.
“Kaba sngewsih wat hapdeng ka jinglehbha jong ka sorkar ban pynkiew ïa ki college la ki dei ki College sorkar bad ki College shimet, hynrei haba phai sha ka Enrollment jong ki samla pule ka long kaba duna eh,” ong u myntri.
Ha kajuh ka por ula ai ka jingïaroh ruh ïa u MLA ka Jowai uba la wanrah shibun ki kam pynroi hapoh ka Constituency, ha ka juh ka por ula kular ban pynïoh halor ka jingdawa lyngba ka Memorandum jong ka Jowai Polytechnic ha kine ki kyndiat bnai.
Katba u ma Wailadmiki Shylla haka jingkren ula ai ka jingïaroh halor ka jingshlur jong ki samla pule ban mih shakhmat ban pynsngew ïa ki jingdonkam ka Jowai Polytechnic, ula pynsngew ruh halor ka jingdonkam ba kane ka jaka pule kan pynthymmai ïa ka rukom ai jinghikai katkum ka jingdawa ka por lyngba ki tiar ki tar.
Kum u MLA ka thaiñ u ong la donkam ban pynkiew kyrdan ïa kane ka jaka pule sha ka Engineering College.
La pynphuh pynphieng shuh shuh ïa kane ka sngi da ki jingrwai bad ki jingshad tynrai na ki samla pule jong ka Jowai Polytechnic.