Pynlong ka BIS Guwahati Branch ïa ka Awareness Programme halor ka BIS Certification ha Mawkyrwat

Mawkyrwat, Jymmang 29: Ka Bureau of Indian Standards (BIS), Guwahati Branch Office ryngkat ka jingïatreilang bad ka ophis jong ka District Commerce and Industry Centre (DCIC), South West Khasi Hills District, ka la pynlong ïa ka awareness programme halor ka bynta ki MSMEs ba ïa dei bad ka BIS Certification hapoh ka Community Hall, Mawkyrwat, South West Khasi Hills District.
Kane ka prokram ka don ha ka ïa ka jingthmu ban pynsngewthuh hapdeng ki nongshna mar ki bym pat don ïa ka laisen BIS, ki karkhana rit, ki MSME, bad ki nongseng kam seng jam kiba kwah ban seng kam seng jam halor ka jingdonkam jong ka jingpynbeit ryntih, ka jingpynshisha ïa ki mar, ka ISI Mark, bad ki skhim bishar bniah ïa ka jinglong katkum ka BIS na ka bynta ki mar bad ki jingshakri, da kaba pynleit jingmut ha ka jingbha, ka jingshngaiñ, sha ki nongthied nongpet namar lada don ïa kane ka BIS Certification ka mut ki mar ki long kiba paka kumba kiwei ki mar ki don ïa ka ISI Mark.
Kiba la donlang ha kane ka programme ki kynthup ïa u Bah M. War, General Manager ka DCIC, South West Khasi Hills District bad ha ka jingkren jong u u la ai mynsiem na ka bynta ki paidbah ba kin shim kabu ïa kane ka program khnang ba kan long ka jingmyntoi ïa ki namar shisien ba ki mar ki mata ki la don ïa ka dak thih jong kane ka BIS me kum ka ISI ki mar ki long kiba bha.
U la ong ruh ba lada ki don ruh ïa kane ka BIS Certification ki paidbah ruh kin lah ban shaniah ïa ki mar ba ki ki die ha ïew. Namarkata, watla ha kine ki jaka jong ngi ki dang duna ki karkhana hynrei shim ïa kane kum ka lada ban myntoi ïa ka la shai la shi sngi.
Ki Resource Persons ha kane ka programme ki long u Abhinash Bordoloi, Scientist bad Joint Director ka Bureau of Indian Standards (BIS) Guwahati uba la kren halor ki mat kiba ïadei bad ka “Grant of License” bad “Management Systems”, katba u Jishnu Das na ka Bureau of Indian Standards (BIS) ruh u la ai jingpynshai halor ki jait jingïoh license bapher bapher jong ka BIS na ka bynta ki MSMEs bad ruh ki rukom aplai ïa ki.
U Dr. Rinku Das, Founder & Director jong ka Northeast Livelihood Promotion Services, Guwahati uba la long ruh kum ka nongpynïaid jong ka jingïalang bad u bah Melvenson Marngar u la shimbynta kum u nongkylla ktien ne translator ha ka program.
Hadien ka programme la pynbud da ka jingïakren jingïatai paidbah kaba la ai lad ïa ki nongwan jingïashim bynta ban buh jingkylli bad ban ïoh jingshai shuh shuh halor ki rukom jingïoh ïa Bureau of Indian Standards (BIS) Certification bad ki jingmyntoi kiba don hapoh jong ka.
Ha kane ka program ka la sakhi ïa ka jingïashimbynta shitrhem jong ki nongsengkam shnong, ki nongmihkhmat jong ki MSMEs bad kiwei ki bynta ba ïadei, kaba pynpaw ïa ka jingkiew ka jingdonkam ban bud ïa ki quality standards bad certification processes khnang ban kyntiew ïa ka jingshaniah ha ki mar bad ka jingïaleh paidbah ha ïew.