Nongstoiñ, Nailur 03: Ka Voice of the People Party Mawthadraishan ka la pynpaw ïa ka jingsngewkhia kaba jur halor ka jinghiar dor kynsan kynsan u biskot, u ba na ka dor kaba da ki phew tyngka hynrei mynta la hiar shaduh ka lai tyngka shi kilo.
Ki nongïalam ka Seng ki la ïoh ïa ka jingud jong ki paidbah kiba ju thung ne rep biskot, ha kaba ki la ïathuh ïa ka jingduhnong namar ka jinghiar dor kynsan u ne u mar rep. La ong ba ha ka jingshisha ki paidbah ki la sdang ban shimkhia ban rep na ka bynta ban kyrshan ïa ka rep ka riang bad ka kamai kajih, hynrei kumba ka long mynta ym don jingmut ei ei.
Ka Seng ka pynpaw ruh ba ha ka kam rep biskot ki don shibun ki jinglut bad ka jinglah ban ïoh ka dor kaba biang ban ïarap ïa ki nongrep.Kumjuh ruh kan long ka jingkyrshan ha ka jingïaleh ban kyntiew ïa ka rep ka riang ïa une u jingthung u ba lah ban shalan shaduh shabar.
Kumta, ka Party ka kyntu ïa ka tnad ka rep ka riang ban peit lem ïa kane ka jingeh ba ki nongrep ki ïakynduh. Ka kyntu ruh ïa ka sorkar jylla ban thaw lem ki lad ki lynti ban pynim lem ïa ki nongrep biskot ha ka jylla khnang ban long ka jingkyrshan lem ïa ki ha ka por ba hiar ka dor u biskot.
Na ka liang u Bah P. Sohkhlet MDC Parïong-Mawthadraishan u la pynpaw ka jingbynñiaw halor kane ka jinglong jingman jong ka dor ka mur u biskot.U la ong ba ha ka thaiñ Mawthadraishan kiba bun bah ki nongrep ha ki shnong bapher bapher, ki dei kiba khlaiñ bha ban rep biskot.
Kum u nongmihkhmat jong ka Pariong bad Mawthadraishan, u pynpaw ka jingsngewkhia bad buh ruh ka jingkyntu na ka sorkar bad ki bor ba dei peit, ba kin shimkhia halor kane ka mat kaba ïa dei bad ki nongrep biskot.
