Shillong, Ïaiong 29 : U Bah Vincent H Pala uba dei u President ka Meghalaya Congress Pradesh Committee (MPCC) uba dei ruh u MP barim ka Shillong ula iathuh ba u dang pyrkhat ban mih iakhun ïa ka elekshon shiteng samoi ka Shillong Lok Sabha, bad la khmih lynti ba ka party kan sa shim rai ïa u kyrtong hapoh ka 15 tarik Jymmang hadien kawei pat ka jingiasyllok.
Kane ka shuki kala sah thylli hadien ka jingiap noh u MP barim ka VPP Dr Ricky AJ Syngkon ha ka 19 tarik Rymphang.U Bah Pala ula wan ba-ar hadien u Dr Ricky ha ka elekshon Lok Sabha 2024.
Haba ïa kren bad ki lad pathai khubor u Bah Pala u la ong,”Nga tharai ba ngim don iano iano ruh.Nga hap ban iakhun hynrei ngi dang ap ia ka jingialang ban shim ia ka rai….dang shen ngi la shong jingialang bad ia ka rai la phah sha Delhi ba nga dei ban iakhun hynrei ngi khlem shim ia ka jingpynsngew jong baroh ki Block bad District”.
Shuh shuh u Bah Pala u la ong,”Nga tharai ba ngin sa don biang ka jingialang lehse hadien ka 10 tarik Jymmang, bad hangne ngin sa shim rai” ong u Bah Pala haba pyntip ba ka la don ka jingtyrwa ïa ka kyrteng jong u sha ka AICC haba nyngkong, hynrei ula pan por.
U Bah Pala u la ong, Ka don kawei ka jingialang, kaba kila tyrwa ïa ka kyrteng jong u bad ïa kane lah dep ban phah sha Delhi hynrei ha katei ka por, nga ong ïa ki ba kin ap shuwa namar nga hap ban iakren bad ki bahaiing lem bad ki paralok, kumta kan bha ngin iashong jingialang biang sa shisien.
