Bym pat ai NoC ka Elaka Narpuh ïa ka M/s MCPL, dawa pynsangeh shwa ïa ka Public Hearing

By Mawphor News Desk On Sep 20, 2024

Khliehriat, Nailur, 19: Ka Jaiñtia National Council (JNC) Central Executive Council ha ka sngi Palei ka la dawa ïa ka Meghalaya State Pollution Central Borad (MSPCB) ba kan pynsangeh noh shwa ïa ka Public Hearing jong ka Ms/Meghatop Cement Private Limited ba thmu ban pynlong ha ka 18 tarik, Risaw, 2024 ha ka shnong Wahïajer, East Jaiñtia Hills District.
Ka seng ka la pynpaw ïa kane ka jingdawa lyngba ka dorkhas ba la phah sha u Member Secretary jong ka Meghalaya State Pollution Central Borad (MSPCB) lyngba u Deputy Commissioner jong ka East Jaiñtia Hills District.
Ha ka dorkhas ba la soi da u President ka JNC u Bah Sambormi Lyngdoh bad u General Secretary u Bah Wanshwa Suting, ki la ong ba katkum ka jingpynbna (notification) kaba la waan na u Member Secretary jong ka MSPCB, Shillong No.MPCB/TB-360/2024/EJHD/MCPL/2024-25/4 Dtd. Shillong, ha ka 17 tarik, Nailur 2024 la ïohi ba ka MPSCB ka la buh tarik ban pynlong ïa ka Public Hearing jong ka Ms/ Meghatop Cement Private Limited ha ka shnong Wahïajer, Elaka Narpuh, East Jaiñtia Hills District ha ka 18 tarik, Risaw 2024 ha ka por 11:00 baje mynstep.
“Hynrei ngi sngewlyngngoh haba ngi ïohi pat ïa kawei ka khubor ha ka 17 tarik, Nailar 2024 ba la pyllait da u (L) Kynjaimon Amse, u Muktiar uba dang shu dep khlad ha ka jingjia aksiden, uba la ong ba ka Ms/Meghatop Cement Private Limited kam pat ïoh satia ïa ka syrnot No Objection Certificate (NOC) na ka Dorbar lane na u Doloi jong ka Elaka Narpuh ha kaba ïadei bad ka jingthmu ban tei ïa ka shlem pynmih dewbilat ha ka thaiñ Narpuh.
“Hynrei ngi sngewkyndit ba ka Jaiñtia Hills Autonomous District Council (JHADC) ha ka 3 tarik, Naitung 2023 ka la ai ïa ka jingbit kum ka Clearance ïa ka M/s. Meghatop Cement Private Limited ban tei ïa ka karkhana ban pynmih 3 million ton bad 50 MW ka bording ne ka Captive Power Plant WHRS System khlem da bud ryntih ïa ki kyndon kiba dei ban bud bad la kynnoh ruh ba ka kompeni ka la ïoh ïa ka syrnot NOC ba shipor na ka Elaka Narpuh kumba la kynthoh da u (L) Kynjaimon Amse kumba la paw ha ki pathai khubor” pynpaw ka JNC-CEC.
“U (L) Kynjaimon Amse u la pynpaw ruh lyngba ki pathai khubor ba ka syrnot NOC kaba tang shi por lane kata ka Provisional NOC kaba la ai da u Doloi jong ka Elaka Narpuh ha ka 3 tarik, Naiwieng 2022 kam dei satia kata ka NOC kaba paka, hynrei ka long tang ka ktien kular kaba na ka liang u Doloi u la ong ba ka syrnot NOC na ka bynta ban tei ïa ka karkhana jong ka Meghatop Cement Pvt Ltd ha Narpuh ka dang don hapdeng ka jingpyrkhat bad ka jingïatai ha ka Dorbar Elaka Narpuh ïa kaba nga kular ba ïa ka NOC yn sa ai ynda ka Elaka ka la ai ïa ka jingmynjur (“This is to certify that the No Objection Certificate for setting up of cement plant by Meghatop Cement Private Limited at Narpuh Village is under consideration by the Dorbar of Elaka Narpuh. I do hereby assure that the NOC will be issued once the Dorbar of Elaka is passed the resolution.)”
Ka JNC ka la pynpaw ïa ka jingsngew kyndit bad ong ba kane baroh ka pawshai ba ïa ka syrnot NOC kaba la ai kam dei satia ka NOC kaba paka na ka bynta ban tei ne shna ïa ka shlem pynmih dewbilat ha Wahïajer Narpuh bad kat haduh mynta hi ka Elaka Narpuh kam pat shym la pynlong ïa ka jingïalang na ka bynta ban ai ïa ka NOC ïa ka karkhana.
“Kaba kham sngew lyngngoh shuh shuh ka long ba ha ka 14 tarik mynta u bnai, u General Secretary jong ka Elaka Narpuh, u Bah S.Sumer u dang pynbna paidbah ba katkum ka jingbthah jong ka Executive Dorbar ba la pynlong ha ka 12 tarik mynta u bnai la shim ïa ka rai ban buh ïa ka jingïalang jong ka Dorbar Elaka Narpuh ha ka 23 tarik mynta u bnai na ka bynta ban ïakren halor ka jingpan NOC da ka M/s. Megatop Cement Private Ltd. Kane hi ka pawshai kdar ba ka M/s. Megatop Cement Private Ltd. kam shym ïoh satia ïa ka syrnot NOC ba pura na ka Dorabar jong ka Elaka Narpuh,” la ong ka JNC.
“Ngi sngewthuh shai ba ka jingdon ka JHADC ka long ban ïada ïa ki hok longtrai, ïa ka khyndew ka shyiap jong ki paidbah ka rilum Jaiñtia hynrei lada ka long pat ha kane ka rukom ka JHADC ka paw ba ka la shukor ïa ki paidbah jong ka Elaka Narpuh bad ïa ki paidbah jong ka rilum Jaiñtia bad kane ka jingleh ka JHADC ka long kaba ym lah ban pdiang,” la kynthoh ka JNC.
Ka JNC ka la pynpaw ruh ba katkum ka jinglum jingtip jong ka seng la lap ruh ba ka Ms/Meghatop Cement Pvt. Limited kam pat ïoh satia ïa ki kot ki sla kiba donkam na ka Elaka Narpuh ban tei ïa ka karkhana ba dei na kata ka daw ka JNC ka ai jingmut bad ka kyntu ïa ka MSPCB ba dei ban pynsangeh shwa ïa ka public hearing jong ka Ms/Meghatop Cement Private Limited kaba la thmu ban pynlong ha ka 18 tarik, Risaw, 2024.