Nongpoh, Nailur 29: U Executive Member ba dei peit ïa ka Trade, u Bah Gigur Myrthong ryngkat ki MDC bad ki Enforcement ka Khasi Hills Autonomous District Council mynta ka sngi ki la hiar sha ka thaiñ Killing ha Ri Bhoi District na ka bynta ban khynra ïa ki Karkhana tylliat maw kiba ym don kot don sla bad ha kane ka jingleit jurip ki la ioh ban khang tala syndon ïa kawei ka Karkhana tylliat maw ba la tip kum ka ka M/s Concord Stone LLP ha ka thaiñ Killing kaba dei halor ka nongrim ba kam don ïa ka trading License bad kiwei kiwei ki kot ki sla ba la ai bor da ka KHADC.
Kane ka jinghiar jurip une u EM ka trade ryngkat kiwei ki MDC na ka KHADC, ka dei hadien ba ki la ioh jintip ba bun ki bar jylla ki la leh mon shaba palat ban bsuh khlieh ha ki kam khaïi lyngba ki kor tylliat maw khlem da ioh jingbit na ka Council kaba dei katkum ka United Khasi Jaintia Trading by Non-Tribal Regulation Act.
Ha kane ka jingleit jurip ïa kitei ki Karkhana tylliat maw ha ka thaiñ Killing la lap ruh da kitei ki bor ba dei peit ka KHADC ba la don shibun ki Karkhana kiba ym don ïa ka Trading License bad ruh ki don ki bar jylla kiba wan trei ha kitei ki karkhana ruh kim shym la don ïa ka Labour License.
Lyngba jong kane ka jingleit khynra ïa kitei ki Karkhana tylliaw maw ha katei ka thaiñ Killing, ki bor ba dei peit ka KHADC ki la sakhi ruh halor ka jingleh tuh ki bar jylla kiba la khang noh ïa ki Karkhana hadien ba ki la ioh jingtip bna ka don kane ka jingwan khynra Trading License bad don ruh kiba la wan mih bad kam ba ki dei jong ki Khasi bad Garo tang ban lait ka shah khang ha ka KHADC.
Haba kren sha ki lad pathai khubor, u EM ba dei peit ïa ka tnad Trade ka KHADC, u Bah Gigur Myrthong u la ong ba kum ka Council ka sngewkhia halor ka jingleh mon ki bar jylla ban wan sengkam sengjam ha kane ka thaiñ Khlem da ioh bor na ka Council bad la sakhi ruh mynta ka sngi ba bun ki bar jylla kim don ïa ka Trading License ha kaba ki la shuh pynïaid beaiñ ïa kitei ki Karkhana.
U la ong ruh dei hadien ba ka Council ka la ioh jingtip ba ki bar jylla kim shym la but satia katkum ki kyndon jong ka United Khasi Jaintia Trading by Non-Tribal Regulation Act ba la pynlong ruh ïa kane ka jingwan jurip bgad kaba sngewlyngngoh ba ka long shisha kaba shisha ba ki bar jylla ki pyrshang ban wan seng kam seng jam khlem da don ki kot ki sla kumba la lap mynta ka sngi ha kane ka jingwan jurip ïa ki Karkhana tylliat maw ha ka thaiñ Killing ha Ri Bhoi.
“Dang shen ruh haduh 46 tyli ki dukan jong ki bar jylla la phah khang khyrdep noh na ka daw ba kim don ïa ki trading license ha ka jingwan jurip u CEM ka KHADC bad la dep ruh ban ai wat ka Showcase Notice bad ka long pat kaba sngewlyngngoh ba ha kane ka thaiñ ruh bun ki bar jylla ki leh kumjuh khlem da don ki trading License” ong u Bah Gigur Myrthong bad bynrap ruh ka Council kan ai por 7 sngi ba kin wan ban pynbiang ïa ki kot ki sla bad lada kim lah ban pynbiang ïa ki kot ki sla ka Council kan leh beit katkum ki kyndon ban khang khyrdep syndon ïa kitei ki Karkhana bym don kot don sla” u la bynrap.
U la bynrap ruh da kaba ong, na ka bynta kito ki Karkhana ba la wan kam da ki Khasi bad ki Garo ka council kan ai por 2 sngi ba kin wan rah ïa ki kot ki sla bad lada lap pat ba kim lah ban pynshisha ïa ki kot ki sla ka Council kan leh kumjuh ban pynshitom katkum ki kyndon. Shuh shuh, u la pynpaw ruh ba ka KHADC kan nym shong kli kti bad kan sa thaw ïa ki 3 tylli ki kynhun na ka bynta ban wan khynra ïa ki Trading License bad Labour License ha ka thaiñ Khanapara, Umtyrnga, Pilangkata bad kiwei kiwei ki jaka bad ka thong hi ka long ba kin nym ailad ba ki bar jylla kin shu wan seng kam seng jam khlem da biang ki kot ki sla kaba ki dei ban ioh bor shuwa na ka council haba ki wan ban seng kam seng jam ha kane ka jylla.
Kiwei kiwei kiba la ïa don lang ha kane ka jingleit khynra ki kynthup ïa u MDC ka Nongstoin, u Bah Gabriel Wahlang, u MDC ka Jirang, u Bah Victor Rani, u Syiem ka Raid Marwet, u Paiem Ken Syiem bad kynthup ruh ki Ophisar na ka tnad Enforcement ka KHADC.
