Bun ki Party mynta ki shu ïa thung ïa ki Candidate, ym dei ba ki da jied

Ha kine ki snem mynta, bun ki party ki kham sngewtynnad ban shu thung da ki nongkitkam kiba na jrong (high level) ha ka jaka ban ailad lang ïa ki nongkitkam bad ki nongkyrshan ka party na ki shnong (unit) ne ki Polling Station bapher bapher ba kin ïadon bynta lang ban ïa jied ïa ki Candidate ha ki Constituency bapher bapher.
Ki kheiñ jem ne shim suk beit ba ki candidate ba la jied da ma ki na jrong (high level), ki nongkyrshan bad riew ieit party kin shu kohnguh beit khlem kyrngah shuh namar ki shim beit ba lada ong ma ki lieh, ki nongkyrshan ka party ruh kin dei ban shu ïa lieh lang bad lada ong ma ki iong ruh, ki nongkyrshan party ruh ki dei ban shu ïa iong lang.
Ban shu kheiñ beiñ ne kheiñ kai ïa ki nongkyrshan party man ka shnong ka long kaba ma shibun. Kane ka rukom leh bad pyrkhat ka bakla shi katdei eh khamtam ha kito ki party kiba kheiñ ne shim ba ki dei ki party jong u paidbah (democratic party).
Kiba bun hi ki nongïalam kiba na jrong(State/District Level) kim da salia ne kim da ñiewkor than eh ïa ka sur u paidbah. Wei ki la mon ne ibang ma ki, thrait thrait, hangto hangto hi khlem pynslem shuh ki shu pynbna ïa ka kyrteng ki Candidate.
Bun ki paidbah na ki shnong bapher bapher ki shu ïa ang lyngngoh bad kyndit lut haba tang ïa ka durkhmat dur khmut bad ka kyrteng u Candidate jongki ruh kim pat da ïa tip bad ïohi satia ïa u ne ïa ka.
Ynda u Candidate u leit sha ki paidbah sha ki shnong bapher bapher ruh, ki nongkyrshan party ki ong pynban ba u dei u Candidate ka High Level ba shu pynhap beit na bneng khlem da ïa syllok lang ïa ki.
Lada jied ne ym jied ïa u ruh, ne lada jop ne rem ruh, lah tip bad kitkhlieh hi ka High Level ïa u nadong sha dong namar la shu thung hi da ka High Level.
Namar ka jingbym ïa donbynta lang jong kiba bun ki paidbah ha ka rukom ïa jied ïa u Candidate, ka jingkitkhlieh ne ka jingtrei shitom ban trei shit rhem ban pynjop ïa u ne ka Candidate ruh ka kham shong per bad sting thew noh. Jin lada ki ailad ban don bynta lang ki paidbah nongkyrshan na ki unit bapher bapher ba kin ïa don bynta lang ha kaba ïa jied lang ïa u Candidate, kata, ki paidbah nongkyrshan party ruh ki sngewtrai bad sngew kitkhlieh lang ïa ka kam bad kin hap ban ïa trei shitom lang na ka bynta ban pynjop donburom ïa u/ka Candidate namar lada u rem, kin sngewsih bad sngew sah pap bad jah burom ïa ka jingïarai lang ma ki.
Ngi ïohi ba ha kiba bun bah ki Constituency, la ki dei na ki National ne Regional Party, ki mih pynban ka huri-hura, jingïa pait-ïa pra bad jing bym ïa sngewthuh jingmut para nongkyrshan jong kajuh ka party wat ha kajuh ka Constituency ruh.
Ïa ki nongkyrshan party kiba kham rim la niew beiñ bad ym don ba ithuh shuh ïa ki. Ki sa sdang ban wad briew ne nongkyrshan noh da kiba thymmai. Hynrei, kane lei lei ka nang sniew bad nang pynkulmar shuh shuh pynban ar shah lai shah. Kiba rim ruh lah duh jingshaniah, kiba thymmai pat dang artatien ban shanïah.
Bun ki Candidate jong ki party bapher bapher ki ban shu rem ei kha-ma-kha khem poi pyrkhat tang na ka daw jong ka jingsngew sarong bad leh ba heh (dictatorship) jong kine ki nongïalam party bapher bapher ha kane ka MLA Election ka ban sa long shen ha u snem 2023.