Buh mawnongrim u Narendra Modi ban tei ïa ka EMR School ha Domjyrti

Mawkyrwat, ‘Naiwieng 15: U Myntri Rangbahduh ka Ri India, u Narendra Modi ha ka sngi Thohdieng u la buh ïa u Mawnongrim ban tei ïa ka Eklavya Model Residential School (EMRS) ha shnong Rangmaw-Domjyrti kaba hap hapoh ka South West Khasi Hills District, kaba jngai kumba 13 kilomitar na Mawkyrwat.
La mang pisa t. 43 klur ban tei ïa ka Eklavya Model Residential School ha ka shnong Domjyrti ba la bei tyngka da ka Ministry of Tribal Affairs ka Sorkar India bad ba la aiti sha ka WAPCOS Ltd bad la buh thong ban pyndep ha u snem 2026.
Ka jingthmu ban tei ïa ka EMRS ka dei ka sienjam kaba kongsan ha ka jingpyrshang jong ka Sorkar India ban kyntiew ïa ka pule puthi na ka bynta ki jaitbynriew riewlum ha kylleng ka ri.
Ha kane ka sngi, u Modi u la plie ïa ki 10 tylli ki Eklavya Model Residential School (EMRS) bad u la buh ruh ïa u maw nongrim na ka bynta ki 25 tylli ki Eklavya Model Residential School (EMRS), ha kaba ka shnong Domjyrti ka la dei kawei na ki shnong ba ïoh kum kane ka skul.
U MLA jong ka Mawkyrwat u Bah Renikton L. Tongkhar haba kren ha kane ka sngi, u la pyntip ba la ithuh ïa ka jaka ban tei ïa ka Eklavya Model Residential School kaba ladep ban bhah kyrpang na ka Sorkar India bad ïa ka jingtrei la aiti ha u kontraktor Aloysius Arengh ryngkat ka jingpynthikna ba shen yn sdang noh ïa ka jingtrei ban tei ïa ka khnang ba yn ïoh ban pyndep ha ka por kumba la buh.
Ha kane ka sngi la donlang u Deputy Commissioner ka South West Khasi Hills District Bah B. Mawlong, u Superintendent of Police Bah G.D. Kharwanlang, ki Additional Deputy Commissioner Bah L.T. Tariang, MCS bad u Bah L. Kynjing, u DSEO South West Khasi Hills District, u Block Development Officer ka Mawkyrwat C&RD Block Bah I. Lawrynïang, u Bah D.G. Nongsiej, ki nonghikai, ki khynnah skul lem bad kiwei kiwei.