Shillong, Naiwieng 15: Ka nguh blei ka dem blei hapoh jong ka Ïewduh da ki san kur bad ki khatwei kur jong ka Hima Mylliem ki la pynlong ïa ka lehniam pom blang ha Ïewduh ha ka sngi Thohdieng kaba dei ka sngi ïewrynhep ïa kaba la buh naduh ki por kulong kumah.
Ïa kane ka jingleh niam la leh da ki san kur bad 11 kur jong ka Raid Mylliem, da ka kñia ka khriam, da ki blang lieh sada kaba khlem thoh dak eiei bad u sniang ïong ba khlem thoh dak bad ki syiar ban nguh ban dem katkum ki riti dustur jong ka hima bad ka raid.
Ïa ka jinglehniam la sdang ha khlieh Ïewduh ha kaba la pyndep ïa kane ka niam ka rukom ha kaba ki khun ki hajar jong ka hima khamtam eh na ka kur san kpoh bad khatwei kpoh jong ka Raid Mylliem, ha kaba u paiem Ainam Manik Syiem u la ïadonlang ha ryngkat kiba khraw ba tri ka hima. Hadien ka jingleh niam na khlieh ïewduh la wan ban pyndem sa ïa ka niam ka rukom ha kjat jong ka ïewduh ryngkat ka knia ka khriam ha Basa Tympew bad la bud sa ka shad ka kmen da ki khun ki hajar jong ka Raid Mylliem.
Ha kane ka sngi lehniam kaba shisien shisnem na ka liang jong ka hima ka la khang ïa ka ïew baroh shisngi namar kane ka ïew kam dei tang ka ïew kumba long lem kiwei ki ïew hynrei ka dei ka ïew niam ïew kyntang kaba ka hima ka da pynlong ïa ka nguh dem blei da ka niam ka rukom kaba kila bat naduh ki por u mynba rim ba jah bad ka dang ïai bteng haduh kine ki sngi.
Ha kane ka jinglehniam pom blang mynta u snem, kiba la mih khmat ïa ki san kur kiba ïadon bynta lang ha kaba pyndep ïa ka niam ka rukom ki long, na ka kur Kharkongor, bad kiba san. Ïa kane ka jinglehniam la pynlong da ka duwai ka phirat na ka bynta ban bha ka ïew ka hat bad ka kamai kajih jong baroh shisnem.
