Buh mawnongrim u Myntri Rangbah ïa ka GTUWSS ha Tura

0

Shillong, K’Lyngkot 30: U Myntri Rangbah ka Jylla u Conrad K Sangma u la buh Mawnongrim ïa ka Greater Tura Urban Water Supply Scheme ha ka jingïalang kaba la long ha District Auditorium, Tura West Garo Hills ha kaba ïa kane ka prokram la pynlong ha ka sngi nyngkong.
U la ong ba kane ka jingbuh mawnongrim ïa ka Greater Tura Urban Water Supply Scheme, kadei ka kam kaba kongsan ha ka jingthmu jong ka Sorkar ban pynbiang ïa ka um bam um dih ha man ki tyllong ïing jong ka sor Tura.
Haba kren u Myntri Rangbah u la ïaroh ïa ka jingtrei shitom jong u Myntri ka tnat PHE, u Principal Secretatary bad ki ophisar ka tnat ban pynurlong ïa ka jingangnud ban sdang noh ïa ka project Greater Tura Urban Water Supply Scheme.
U la ong ruh ba kane ka sngi kadei ka sngi ka ban sah jingkynmaw na ka bynta ki paidbah ka Tura baroh kawei. U la pynkynmaw ba ïa kane ka Scheme la thmu naduh u snem 2004 da u P A Sangma (Bam Kwai Dwar U Blei) hadien ba la bishar ïa ka jingeh jong ki nong shong shnong ban ïoh ka um kaba biang ha sor Tura.
U Conrad u la ong ba ka jingpyntreikam ïa kane ka projek ka long kaba donkam namar ym tang kan pynbit pynbiang ïa ka jingdonkam um hynrei ka jingshna ïa ki jaka pyllang um kan long ruh ki jaka jngohkai pyrthei, ki jingdonkam na ka bynta ka tnat ri dohkha bad kan pynbiang um ruh na ka bynta ka rep ka riang bad kiwei kiwei ki kam kiba myntoi ïa ki paidbah.
“Ha ryngkat bad ka jingkyrshan na ka Special Assistance on Capital Investment ka Sorkar Pdeng la ïoh ban buh ïa u mawnongrim ban pyntrei ïa ka Greater Tura Urban Water Supply Scheme ha ka jinglut kaba ym duna ïa ka T. 400 klur bad ïa kane ka project la buh thong ban pyndep hapoh 24 haduh 36 bnai,” la bynrap u Myntri Rangbah.
U Myntri Rangbah u la khot bad wer ruh ïa ka jingïatreilang jong ki Nokma ban sumar bad pynneh ïa ki jaka pyllang um.
Haba ong ba tang ka jingpyntreikam ïa kine ki skhim kan ym urlong khlem ka jingkyrshan jong ki paidbah ka thaiñ, u Myntri Rangbah u la ong, “Ïa ki jaka pyllang um, donkam ban ïada, ban pynneh pynsah ha ryngkat ka jingïatreilang bad ki heh jong ki tnat ka rep ka riang, ka tnat jngohkai pyrthei namar ki long ki lad kamai lyngba ka KFW”.
U Myntri Rangbah ka Jylla ula pyntip ruh ba la dep ban buh ïa u mawnongrim na ka bynta ban tei ïa ka Integrated Administrative Complex kaba thymmai bad ka jingtrei ban tei ïa kane ka projek kan sa sdang noh shen bha ha Tura ka ban pynbiang ïa ki jingdonkam baroh sha ki paidbah ka thaiñ.
Haba kdew shaphang ka jingpynroi ïa ka IT Park ha Tura kaba dang ïaid shakhmat, u la ong, “Ynda la pyndep ïa kane ka project, kan ai kam ai jam ïa ki samla ka thaiñ”.
U la ong ruh ba ka jingkamai liengsuiñ na Tura Baljek sha Umroi ka dang don ha ka jingpynkhreh.
Haba ïathuh ba ïa ka bynta kaba ar jong ka Tura Beautification, Street Light, u Myntri Rangbah u la ong ba mynta u snem yn pyntreikam bad ïa kane donkam ka jingkyrshan na ki paidbah ka Tura ban pynneh ïa ka jingkhuid jingsuba.
Katba u Myntri ka tnat PHE, u Marcuise Marak u la ong ba katei ka skhim hapoh ka jingïalam jong u Myntri Rangbah ka Jylla ka dei ka sienjam kaba pawnam ha ka jingïaid lynti jong ka Jylla Meghalaya ban pynbiang ïa ka um kaba biang sha kawei pa kawei ka longïing hapoh ka Jylla.
U Myntri u la pyntip ba ha ki snem ba la dep tang 4550 tylli ki longïing ha ki thaiñ nong kyndong kiba la ïoh um ha ki tyllong ïing hynrei mynta kumba 5 lak tylli ki longïing ki la ïoh um lyngha ka skhim JJM.
U la batai ba ki projek PHE ki donkam ban maramot bad ban shimkhia hadien ba la dep pyndep ïa ka projek kaba don ka jinglut jingsep bad kiwei kiwei ki jinglut bad namar kata la thaw ïa ka Village Water and Sanitation Committee (VWSC) ban shimkhia ïa kine ki kam maramot ne ban sumar ïa ki project.
Haba kyntu ïa ki paidbah ba ki dei ban shim ïa ka jingkitkhlieh bad ban don ïa ka jingsngew trai, u Marcuise u la ong, “Ki briew ki dei ruh ban sumar bha ïa ki jaka ba la ai da ka Sorkar khnang ba ki kam pynroi hapoh ka Jylla kin ïaryngkat kyrdan bad ki kam pynroi ha kiwei ki Jylla ka ri”.
Katba u Chief Secretary ka jylla u Bah DP Wahlang u la ai ka jingkitbok kitrwiang ïa u Myntri Rangbah ka Jylla ha ka sngi kha jong u bad ong ba kane ka projek ka dei ka jingai sngewbha jong u sha ki paidbah ka Jylla.
U Bah DP Wahlang u la pyntip ba dew ba kin don sa 66 tylli ki Pipe thymmai bad yn shna sa 3 tylli ki jaka pyllang um hapoh kane ka projek.
U la ïathuh ruh ba kane ka projek kan pyndap ïa ka jingdonkam um kaba 30 million litar ha ka shisngi na ka bynta ka Tura.

Leave A Reply

Your email address will not be published.