Nongpoh, Jymmang 29: U MLA ka Umsning u Dr Celestine Lyngdoh mynta ka sngi u la plie paidbah ïaki dukan ba paka ha rud surok ne Lay Bye Market haka shnong Umran Ñiangbyrnai, kaba long ka jingmyntoi bad ka jingkyrkhu ïa ki paidbah nongshong shnong katei ka shnong ba kin lah ban kamai ban shong dukan bad ban ieng hala ki jong ki kjat.
Ïa katei ka iew la bei tyngka da ka HDFC Bank lyngba ka CSR bad pyntreikam pat da ka Society for Action in Community Health (SACH). La sakhi ruh ha kane ka sngi da ka jingdon lang u Bah Andrew L. Myrthong, BDO ka Umsning C&RD Block, u Venugopalan MK, Project Manager ka SACH, ka Kong Ibadahun Kharkongor, Asst. Manager ka HDFC Bank Nongpoh Branch, u Bah Stephang Kharbani, Rangbah Shnong Umran Niangbyrnai lem bad kiwei.
Haba kren ha kane ka sngi u Dr C Lyngdoh u la ong ba ka HDFC Bank ka dei kawei naki bank shimet kaba heh tam haka ri India kumta lyngba kane ka jingbei tyngka ka shna ïaki dukan kiba paka bad kiba lait naka sngi u slap ka long shisha ka jingkyrkhu ïaki paidbah ba kin ioh ban kamai ban ieng hala ki jong ki kjat khamtam ban kyntiew ïaka ioh ka kot ka iing ka sem namar katei ka iew ka don harud surok bah National Highway 6.
U la ong ruh ba ka shong haki paidbah ban nang ban pyndonkam bad ban sumar namar ki dukan ki don harud surok bad kiba paka ha kaba bun ki nongleit nongwan ki leit bad wan man ka sngi bad ai ba kane ka lay bye market kan long ka jingkyrkhu ïaki nongshong dukan kiba shong ha katei ka iew rit.
