Kynshi, Nailur 29: Kum shi bynta ban rakhe ïa ka Swachh Hita Seva ne ka jingpynkhuid shnong ba la phah da ka sorkar u Narendra Modi, ka ophis SBM Mawthadraishan Block ryngkat ka jingïatreilang ka ophis SBM Eastern West Khasi Hills District ka la pynlong ïa ka prokram Garbage Free India ne kata ka India kaba lait na ki jaboh da kaba pynlong ïa ka jingpynkhuid ïa ka iew bad jaka sangeh kali ha Kynshi Mawria.
Ha kane ka prokram la pynlong ïa ka jingïalang ba la pynïaid da u Bah P. Sohkhlet, Sordar Kynshi Mawria ha kaba la ïoh jingkren na u BDO Mawthadraishan, u Bah W. Massar, uba la ïathuh ba kane ka prokram ka long shi bynta ban pynsngewthuh ïa ki paidbah ba kin nang ban sumar khuid ïa ka ïing ka se, ka rud ka kiar bad ki jaka paidbah ruh, da kaba kiar na kaba bret pathar ïa ki plastic bad kiwei kiwei pat ki jaboh jabaiñ.
La ïoh jingkren ruh na u DC ka Eastren West Khasi Hills , u Bah G. Kharmawphlang, uba la pynkynmaw ba ka jaidbynriew Khasi kadei ka jaidbynriew kaba leh khuid naduh ki por hyndai hynthai, hynrei katba nang mih ki sngi, i kumba ki paid Khasi ki la klet noh ïa kane ka burom kaba ki la ïoh da kaba bret pathar kat haba lap ïa ki jaboh ki jabaiñ. Hynrei u la ong ba ki prokram kiba kum kine kidei ban pynpynmaw bad kyrsiew biang ïa ki paidbah bakin tip ba ka jinglehkhuid kadei ka kaba kongsan tam ban ïoh ïa ka jingkoit jingkhiah.
U Bah Shakliar Warjri, Myntri ka tnad Sports bad MLA Mawthadraishan, ruh u la pynpynmaw ïa ka jingdonkam ba leh khuid ha ka jingim kaba man la ka sngi. U la pynpaw ruh ka jingsngewkhia ïa ka jingeh kumno pat ban pynkhuid ïa ki plastik, ki jakhlia kiba la lum na ki shnong ki thaw. Kumta u la kular ban pynïoh ka lai kit ñiut ha ka thaiñ Kynshi khnang ba kan pynsuk ïa ki shnong kaba pynkhuid shnong.
Hadien kane ka jingïalang la ïoh ruh ïa ka jingpynkhuid ïa ka bynta jong ka ïew Kynshi bad ïa ka jaka sangeh kali jong ka Shnong Kynshi Mawria, ha kaba la ïashim bynta lang da u Myntri, u DC, u BDO, ki ophisa, ki Engineer bad ki paidbah nongshongshnong.
