Shillong, Jylliew 28: U Myntri Rangbah ka jylla u Conrad K Sangma ha ka sngi Thohdieng u la ong ba baroh ki paralok ba ïatreilang hapoh ka sorkar MDA ki la banjur ban ïaibteng ban ai ka jingkyrshan ïa ka sorkar.
“Baroh ki paralok hapoh ka sorkar MDA ki la pynpaw ha nga ba kin ïai bteng ban ai ka jingkyrshan jong ki bad ngin pyndep ïa kane ka samoi treikam jong ka sorkar jong ngi,” ong u Sangma haba kren sha ki lad pathai khubor. Ïa kane u la pynpaw hadien ba la mih ka jingkynthoh ka seng United Democratic Party (UDP) ba ka lah ban wengnoh ïa ka jingkyrshan na ka sorkar.
Ha kaba ïadei bad kane na ka liang u Conrad u la ong ba kam shym la don kano kano ka jingeh. Ngi dang don ka jingïatreilang. Nga la dep ban ïakren bad ki paralok kiba ïatreilang hapoh ka Sorkar baroh ki la pynpaw ba kin ïaibteng ban ïatreilang. Haoid ki lah ban don ki riew shimet kiba kren bad kynthoh bad kiba pynpaw ïa ki jingsngewkhia ha kaba kane ka dei ka ri synshar paidbah kaba baroh lah ban pynpaw ïa ki jingeh jong ki.
