Baroh ki jait ktien bapher bapher ki dei ki National Language ha ri India : Dharmendra

Shillong, Jymmang, 21: Haduh 15,955 ngut ki samla pule kiba la pas ïa ki kyrdan pule bapher bapher ba kynthup ïa 117 ngut ki PhD, 8 ngut ki M.Phil, 1559 ki Post Graduate bad 14,271 ngut ki Under Graduate ki la shah pynkup burom ha ka XXVII Convocation jong ka North Eastern Hill University (NEHU), Shillong kaba la long ha ka sngi Saitjaiñ.
Ïa kine ki samla pule la pynkup burom da u Myntri ka Sorkar Pdeng uba peit ïa ka Ministry of Education, Skill Development and Entrepreneurship u Dharmendra Pradhan uba la long kum u Kongsan.
Kane ka jingpynkup burom ka long na ka bynta ki samla pule kiba la pas ïa kine ki kyrdan pule bapher bapher na ka bynta jong u snem 2020 bad 2021.
U Pradhan haba kren kum u Kongsan u la ai khublei ïa kine ki samla pule bad ai ruh ïa u kyrwoh khublei ba kin nang ïai tyngshaiñ ha ka jingim jong ki.
U la kyntu ba ki dei ban long ki nongwanrah jingkylla ha ka imlang ka sahlang da kaba ïashim bynta ha ka ‘knowledge-based industrial revolution.’ “Hadien ba la pyndep ïa ki jingpule, phi sdang ban wad kam. Hynrei ïa ki kam yn hap ban pynkha. Phi dei ban long ki nongthaw kam ha ka pateng ban sa wan. Phi hap ban long ruh ki nongai kam,” ong u Myntri bad bynrap ba ka University ka don mynta hakhmat ban wanrah ïa ka jingkylla.
Haba pynshai ïa ka hamsaïa halor ka jingpynlong ïa ka ktien Hindi kum kawei ka ktien hapoh ka ri kaba pur ha ki katto katne ki bynta jong ka ri, une u Myntri ka Ministry of Education ula ong, “baroh ki ktien ba la kren ha ki jylla bapher bapher ki dei ki ktien jong ka ri, la ka dei ka ktien Khasi, Garo, Jaiñtia, Assamese, Bengali, Tamil, Telugu bad kiwei kiwei. U Myntri Rangbahduh jong ka ri u Narendra Modi ula banjur ba baroh ki jait ktien ki dei ki ktien jong ka ri hapoh ka ri India.”
Ka National Education Policy (NEP) ka la plie lad ban pynlong kyrpang ïa baroh ki jait ktien ha ka ri, u la bynrap.
U Pradhan shuh shuh u la banjur ïa ka jingdonkam ban tih bniah ha ka pule puthi ha kane ka juk. “Ka University ka dei ka jaka jong ka Science, ka Technology bad Social Research. Ka jingwad bniah kan plie lynti na ka bynta ka lawei jong ngi bad ïa ki samla ha ka lynti kaba dei. Ka jingtih bnaih kan long na ka bynta ka imlang ka sahlang, na ka bynta u khun bynriew,” la ong u Pradhan.
U la ïaroh ruh ïa ka skulbah NEHU kaba la ai ka jingshakri ha ka pule ka pule bad ka jingwad bniah ha kane ka thaiñ Shatei Lammihngi mynta la 50 snem kynthih.
U Myntri u la banjur halor ka thong jong ka National Education Policy (NEP).
“Kumba 15 lak ngut ki nongshong shnong jong ka jylla Meghalaya ha kaba 14 percent na ka jingbun briew hapoh ka jyllla ki dei na ka rta kaba 3-25 snem. Ka NEP ka ai ïa ka bynta ba kyrpang sha kine ki samla ba dang khie dang san,” u la ong bad ïathuh ruh ba ka NEP kan wanrah ïa ka jingkylla ha ka pule ka puthi khnang ban tei ïa ka ri India kaba khlaiñ.
U Myntri Rangbah ka Jylla u Conrad Kongkal Sangma uba la ïashim bynta lang ha kane ka jingïalang pynkup burom bad u Myntri ka Sorkar Pdeng u la kyntu ïa kine ki samla pule ba kim dei ban shu sahkut hajuh hynrei ban shim ïa ka rai kaba dei ha ka jingim khnang ban poi sha kawei pat ka kyrdan.
“Wat shah jop ha ka jingsharem bad wat ai ba ka jingjop kan mih noh na ka jabieng jong phi,” ong u Myntri Rangbah sha ki samla pule.
Ha kane ka jingïalang pynkup burom la ïashim bynta lang da u Myntri ka tnat Pule Puthi ka Sorkar Jylla u Bah Lahkmen Rymbui, u Vice-Chancellor ka NEHU u Professor P. S. Shukla, ki nonghikai bad ki samla pule jong ka skulbah NEHU.