Shillong, Jymmang 21 : U Myntri ka sorkar pdeng uba dei peit ïa ka tnad Education, Skill Development bad Entripreneurship u Dharmendra Pradhan ula kren shai ba ka sorkar pdeng kam don satia kano kano ka jingthmu ban pynlong ‘compulsory’ ïa ka Hindi.
“ Mano ba ïathuh ïaphi ba ka sorkar pdeng kan pynlong compulsory ïa ka Hindi. Pyni ïa nga haei kata ka jingthoh. Wat pynsaphriang ïa ki khubor kiba bakla” ong u Pradhan haba buh jingkylli hato ka sorkar pdeng ka don jingthmu ne em ban pynlong compulsory subjek ïaka hindi haduh Class X.
U la ong baroh ki jait ktien ha India ki long kiba kyrpang bad kiba donkam tam kumba la dep pynpaw da u Myntri Rangbah duh ka ri u Narendra Modi. La ki dei kino kino ki jait ktien kata lada dei ka ktien Khasi, Garo, Jaintia, Assamese, Bengali, Oriya, Telugu, Tamil, Punjabi, Matathi, Gujarati lane Hindi ki dei baroh ki “National Languages”.
“ Kumta ym don mano mano ba lah ban pynbor ïa kawei pat ka jait ktien hano hano ruh. Nga dei tang u shakri uba rit bad ngan hap ban ïaid kat kum ka polisi treikam jong u Myntri Rangbah duh ka ri ban burom ïa baroh ki jait ktien”.
