Hap hiar u Myntri ka Sorkar Pdeng na kali ban pynjem ïa ki dkhot ka KSU ba dawa ILP

Shillong, Jymmang, 21: Kan long ka jingjia ka bym ju kham jia koit mynno mynno ruh ba uno uno u Myntri ka Sorkar Pdeng un da hiar napoh ka kali kaba u shong ba la syrtap da ki Pulit pahara ba leit ïakren bad ki nongïakhih.
Kane kan dei ka jingjia kaba nyngkong eh ha ka jylla Meghalaya ba mynta ka sngi Saitjaiñ u Myntri ka Sorkar Pdeng uba peit ïa ka Ministry of Education u Dharmendra Prasad u la hiar na ka kali katba u dang thmu ban leit ïashim bynta ha ka jingïalang pynkup burom ïa ki samla pule ba la pynlong da ka skulbah NEHU ha ka XXVII Convocation.
Ki dkhot ka KSU kiba la ieng hakhmat ka khyrdop jong ka skulbah NEHU hapdeng ka jingsyrtap jong ki Pulit ki la pyrta da ka sur kaba jam, “We demand ILP, No ILP No Rest.”
Kane ka sur pyrta kaba jam jong ki dkhot ka KSU kiba rah ruh ïa ki plakad ka la bteng tad haduh ynda la wan poi sa u Dharmendra Pradhan. Ha kum kane ka khyllipmat, ynda la poi ha ka khyrdop jong ka skulbah NEHU u Dharmendra Pradhan u la hiar na ka kali ban leit ïakren bad ki dkhot ka KSU bad kumjuh ïa ki nongtrei jong ka NEHU kiba don hapoh ka shatri jong ka All NEHU Workers’ Union (ANWU).
Ki nongtrei jong ka skulbah NEHU ki la pynsngew hakhmat une u Myntri ka Sorkar Pdeng ba ka Sorkar ka dei ban ithuh noh ïa ki kum ki nongtrei bapura, katba ki nongïalam ka KSU ki la pynsngew ba ka Sorkar Pdeng ka dei ban ai jingmynjur noh na ka bynta ban pyntreikam ïa ka Inner Line Permit hapoh kane ka Jylla Meghalaya.
Na ka liang jong u Pradhan u la kular hakmat kine ki nongïakhih ba un sa rah ïa kine ki jingpynsngew sha ki tyndong shkor jong ka Sorkar Pdeng ynda u la leit phai sha Delhi.
Ka Ingdorbar Thawaiñ jong ka Jylla Meghalaya ka la mynjur ïa ka Resolution ban pyntreikam ïa ka Inner Line Permit ha ka 20 tarik, Nohprah, 2019. Kane ka Resolution haduh mynta ka dang sahkut ha ka alamari jong ka Ministry of Home Affairs (MoHA) mynta la ar snem tam eiei.
U Nongïalam ka KSU u Samla Pynkmenlang Sanmiet ha ka jingïakren bad ki lad pathai khubor, u la ong, “watla ka Ingdorbar Thawain ka Jylla ka ladep mynjur ïa ka Resolution hynrei haduh mynta ngim pat iohi ïa ki dak ki shin ba ka Sorkar Pdeng na Delhi hapoh ka jingïalam jong ka BJP ba kan shimkhia ïa kane ka mat jingdawa jong ngi, khamtam ka ILP. Kum ka dak ban pynpaw sha ka Sorkar BJP bad sha ki nongïalam ki jong ka, da ka jingwan jong u Union Minister mynta ka sngi, ngi la shim ïa kane ka kabu, da kaba rah ïa ki plakad bad ngi sngewtynnat ruh ba ngi la ioh ban ïakren markhmat bad u Union Minister uba la ong ba u sngewthuh ïa ka jingsngew jong ngi ki paid riewlum bad u la ong ba un sa rah ïa kane ka khubor sha Delhi.”
“Ngi ngeit skhem ba kan ym dei kaei kaei kaba lamler ne ba kan shu kut noh tang ha ka jingïakren bad ngi ngeit skhem ba kane ka jingkular jong u ban rah ïa kane ka khubor ba u sngewkhia ïa ka jingsngew jong ngi riewlum kane ka jylla kan long kaba seisoh bad ngi kyrmen skhem ba ka jingdawa ïa ka ILP kan ïai sawa jam ha manla ki jaka bad ki kyntoit jong ka Bri u Hynñiewtrep bad ngi ngeit skhem ba ki paidbah kin ïasnohkti lang bad khlem artatien ngin sa ioh ban kheit ïa u soh uba jop,” u la ong. U President jong ka ANWU, u Bah Napoleon Mawphniang, u la ïathuh ba ka Union ka la phah ïa ki mat jingdawa hakhmat u Vice Chancellor ka NEHU naduh ka 29 tarik, Ïaiong bad aipor ruh 30 sngi ïa ki bor pynïaid ban ithuh noh ïa ki nongtrei Casual kum ki nongtrei bapura kiba la trei ha kane ka skulbah la palat 10 snem.