Jowai, Lber 11: U Hony. General Secretary, ka West Jaiñtia District Sports Association ma Lammat OO Laloo ula pyntip sha baroh ki Affiliated Club hapoh la WJDSA kin hap wan ban pynthymmai noh ïalade sha ka seng na ka bynta u snem 2025.
Ka rukom pynthymmai ïa kino kino ki Club ba pynïasoh bad ka WJDSA kin long kumne harum, ka dor bai pynthymmai (Renewal) 2025 ka long 1000 tyngka, kiba rung thymmai ha ryngkat ki kot ba donkam ka long 5000 tyngka. Kin hap ban phah mar 2 ngut kum ki nongmihkhmat sha ka Association na ka bynta ka Annual General Meeting bad kin thoh bha ïa ki kyrteng jong ki ha ka Letter Head jong ki na ka bynta u snem 2025-2027.
Ka tarik ba khadduh ban pynpoi ïa ki kyrteng kan long hashwa ka 31.03.2025 ha u Hony. General Secretary, West Jaiñtia District Sports Association Jowai. Kiba wan pynpoi hadien katei ka tarik ba la buh ym lah shuh ban pdiang ïa ki.
Ha ka juh ka por la pyntip kito kiba dang sahteng ban siew ïa ka bai Yellow/Red Card bad kiwei de ki Pending Bill kin hap ban siew pyndep shwa hashwa ba kin pynthymmai ïa ki Club jong ki.
U ma Lammat OO Laloo ula kyntu ïa baroh ki Club ban shimkhia ïa kane ka jingpynbeit khnang ban lait na kino kini ki jingeh hadien, ïa ki jingtip ba bnaih lah ban Phone ha une u No. 9612402753.
