Ban wanrah biang ïa ka jingïadei hapdeng ka Meghalaya bad Assam

Shillong, Nailar 20 : U Myntri Rangbah ka Jylla U Conrad K Sangma ha ka sngi Palei, ula pyntip ba ula ïakren bad u Myntri Rangbah ka Assam u Himanta Biswa Sarma halor ki kam thombor ha Shillong ba jia ha ka 19 tarik Nailar bad ki jingjia ba jia hadien kiba ktah ïa ka leit ka wan ha khappud ki ar Jylla khamtam ka jingshah bat ki kali ka Meghalaya ha Khanapara bad kumjuh ruh ka jingbym shah kiew ïa ki kali Assam sha Meghalaya.
Ha ka jingthoh ha X, u Myntri Rangbah u la ïathuh ba baroh arngut ki Myntri Rangbah ki la mynjur ban ïatreilang ha ka ban pynjai jai noh ïa ka jinglong jingman bad khamtam ban wanrah biang ïa ka jingïadei ki ar jylla ban wan phai ka jingïa im suk im saiñ bad ban shngaiñ ka leit ka wan hapdeng ki ar jylla.
“La ïakren bad u Myntri Rangbah ka Assam u Dr. @himantabiswa ba iadei bad ki kam thombor ba sngewsih ha Shillong ha ka 19 tarik Nailar bad ki jingjia kiba bud, kaba la ktah ïa ki riew paidbah bad ki nongleit nongwan jong baroh ar Jylla” thoh u Conrad.
U pyntip ba la buh mynta ïa ki Myntri Sorkar na baroh ar Jylla ba kin ïakynduh bad ba kin pyntyllun shakhmat a ka jingïakren nalor ban wad ïa ki lad ki lynti ha ka ban wanrah pat ïa ka jingsuk, ka jingshniah bad ka jinglong ba jai jai.
“Kyrpad ïa ki nongshong shnong jong baroh ar jylla ban pynneh ïa ka jingsuk, ka jingïalong kawei bad ban kiar na ki jingpynkulmar.Ka Meghalaya bad Assam ki ïadon ïa ki jingïadei ba jylliew bha bad ngi dei ban ïatrei lang ban ïada ïa ki” bynrap u Myntri Rangbah.