Nongstoiñ Nailur 01: Na ka bynta ban tip kham bniah ha kaba ïadei bad ka jingpyntrei kam ïa ki skhim jong ka sorkar pdeng bad jong ka sorkar jylla ka Ministry of Information and Broadcasting jong ka sorkar pdeng lyngba ka ophis jong ka Press Information Bureau Shillong ha kane ka lah sngi u Blei ka 31 tarik Nailar ka la pynlong ïa ka jingïalang ba kyrpang ha Nongstoiñ ha kaba la khot lang ïa baroh ki ophisar na ki tnad trei kam jong ka sorkar ha ryngkat bad ki lad pathai khubor na ka bynta ban ïathir bad ïatai halor ka jingpyntrei kam ïa ki skhim kiba ka sorkar pdeng ka la bei sha ka sorkar jylla bad ban pyntrei kam ha baroh ki district.
Ïa katei ka jingïakynduh lang ba kyrpang la pynlong ha Conference hall ha ophis jong ka Deputy Commssioner jong ka West Khasi hills. Ha katei ka sngi la pynïaid ïa ka jingïalang da u Gopajit Das IAS Asisstant Director jong ka Press Information Bureau Shillong ha ryngkat ka jingïadonlang jong u Bah Methodius Dkhar MLA ka Mawshynrut uba long ruh u Myntri sorkar uba bat ïa ka tnad food & Civil supplies & Labour u la long u kongsan bad ka Hema Nayak IAS Deputy Commissioner ka West Khasi hills ka la long ka symbud kongsan.
Ha kaba ïadei bad ka jingpyntrei kam ïa ki skhim ba ka sorkar pdeng ka la bei pisa sha ka sorkar jylla la ïoh ïa ka jingpynshai na ki ophisar kiba la wan ban mihkhmat na ki ophis ba kynthup ïa u District Horticulturer Officer, District Agriculture Officer, Officer jong ka Fisheries, Public Health Engineering, Soil Conservation, Tourism, PWD bad kiwei kiwei.
Ha kaba ïadei bad ka jingpyntreikam ïa ki skhim hapoh ka district, ki ophisar ki la pynshai ba ka jingpyntrei ka long kaba ïaid beit namar ba la pyntrei katkum ki kyndon ba ka sorkar ka la bthah. Nalor kata ki la pynshai ruh ha kaba ïadei bad ki skhim ba bun jait ba ka sorkar ka la bei pisa na ka bynta ki nongshong shnong hapoh ka district ha kaba ki don ki skhim kiba la pyntrei kam ha ka rukom kaba dei kata katkum ki kyndon ba la bthah namar ki don ki skhim kiba kynthup lang ïa ka grant bad ka subsidy katkum ba la phiah na ka mang ba ka sorkar ka la buh.
Ha kajuh ka por ki ophisar ki la pynshai ruh ba ki don shibun ki skhim kiba ki ophis kin sdang ban pyntrei kam nagne shakhmat na ka bynta ban pynïaid shakhmat ïa ka roi ka par ha ki shnong ki thaw hapoh ka district baroh kawei.
