Ban lait jingma ïa ki khyllung khynnah bad ki jingri jingdup ker ka Shnong Mawknor ïa u Transfomer

By Mawphor News Desk On Jun 3, 2023

Nongpoh, Jylliew 02: Ban phikir na kino kino ki jingma bad ki jingjia ba sngewsih na ka bynta ki khyllung ki khynnah hapoh ka Shnong bad kumjuh ruh na ka bynta ki jingri jingdup, ka Shnong Mawknor ha Ri Bhoi ryngkat ka Seng Longkmie bad ki Samla ki la mih hi ban ker ïa u Transformer ba la shu iehnoh khlem da ker da ka tnad MeECL ba kane ka lah ban buh jingma ïa ki paidbah nongshong shnong ka Shnong Mawknor.
Ha ka jingïalam u Rangbah Shnong, ka Seng Longkmie bad ki Samla katei ka shnong ha ka 31 tarik u Jymmang 2023 ki la mih paidbah ban ker ïa u Transformer hapoh katei ka shnong shi bynta ban phir na ka bynta ka jingshngaiñ ki khyllung ki khynnah bad ki jingri jingdup hapoh katei ka shnong.
Ha katei ka sngi ba ki la mih ban ker ïa u Transfomer la don ryngkat ruh ka Kong Beti Jyrwa kum kawei na ka nongïalam hapoh ka jylla bad la sakhi lang ruh naduh ka jingdon lang u Rangbah Shnong, u Bah Kmar Kurbah, ka President ka Seng Longkmie, ka Kong Sayantis Sakri bad kynthup kiwei kiwei ki nongïalam shnong bad ki khun samla katei ka shnong.
Kumba la pynpaw da ka Shnong bad ka Seng Longkmie, ka daw kaba ki la mih ban ker ïa utei u Transformer hapoh katei ka shnong, ka dei namar ba ka tnad MeECL kam shym la ker satia ïa utei u Transformer bad bunsien kum ki Longkmie longkpa ki pynpaw ka jingsngew khia ba ioh ka mih kano kano ka jingjia ba sngewsih.
Haba kren sha ki lad pathai khubor, ka Kong Sayantis Sakra kum ka nongïalam ka Seng Longkmie katei ka shnong Mawknor, ka la ong ba ka ai khublei kyrpang naduh u Rangbah Shnong, ki nongïalam shnong, ki riew rangbah bad ki khun samla ha ryngkat ka Kong Beti Jyrwa kiba la ïa don bynta lang ban ker ïa utei u Transformer bad dei lyngba ka jingïadon ryngkat jong ki ba la lah ba ker ïa une u Transformer ban ïada na ka bynta ka jingshngaiñ ki khyllung ki khynnah bad khamtam ruh ki jingri jingdup hapoh katei ka shnong.
Shuh shuh, ka la ong ruh ba na ka liang ka Seng Longkmie ka kyrpad lem ruh ïa ka tnad MeECL ba ka dei ban shim khia ban ker ïa kino kino ki transformer hapoh ki shnong ki thaw, namar bunsien ki mih ki jingjia ba sngewsih tang na ka daw ka jingbym ker ïa u Transfomer bad kane ka jingshim khia ba ker ïa u Transformer ruh ka long ban ïada ïa ki paidbah nongshong shnong bad ki jingri jingdup ban lait na ka jingma jingmynsaw, ka la bynrap.