Ban kynnoh “Political Clown” ïa ka Congress ka long ka jingkren kutlad, sangah ka Congress ïa ka VPP

Shillong, K’ Lyngkot 11: U Nongïalam ka Congress ha Meghalaya u Bah Vincent H Pala u la ong ba kiba bun ki nongïalam ka Voice of the People’s Party ki dei kiba la long CEM teng hapoh KHADC bad na ki 4 ngut ki MLA arngut na ki, ki la shim ïa u lakam ban synshar hapoh District Council hynrei baroh arngut na ki, ki khlem lah ban pynkut ïa ka samoi tang hapoh ka shisnem ki la pulom noh ïa ka kam long nongïalam.
Ïa kane u la jubab halor ka jingkynnoh jong ka VPP ba ka Congress ka dei ka party clown. U la ong ban kynnoh ïa ka Congress kaba dei ka party kaba la don da ki spah snem ka long kaba ym don nongrim satia.
“Ban ong ba ka Congress ka dei ka political clown nga tharai kadei tang ka jingsngew kutlad jong ka VPP namar ki nongïalam jong ki, ki la pulom ha kato ka por bad da kaba ki kynnoh kumne nga tharai ba ki sngew beit ba kin jop kham bun hynrei kane ka pyni ba ki la sngew sarong bad kane ka jingong jong ki kadei ka bym don nongrim, namar ha ka por ba ngi rai ban ïatreilang hapoh ka KHADC ruh kadei hadien ba ka UDP ka la wengnoh ïa ka jingkyrshan ïa ka EC ba la ïalam da ka NPP bad ha kajuh ka por ka wan ka kam kaba kyrkieh kaba dei ka jingdonkam ban pynkylla thymmai ïa ka 6th scheduled kaba la pan ïa ka jingai jingmut jong ka Council kumta ngim banse ban shim ïa ka rai ban ïatreilang namar ban pynkylla ïa ka 6th schrduled ka dei ka por kaba donkam bha bad donkam ïa ki MDC ka Congress kiba la tbit bha halor kane ka bynta,” ong u Bah Pala.
U la ong ba ka jingïatreilang ka Congress hapoh ka KHADC ka long halor ka jingsngew ba ka long kaba donkam bha ban ïada ïa ka ri bad ka jaitbynriew bad hadien ba la dep ban pyndep ïa baroh ki kam bad ba la aiti ïa kane ka jingai jingmut sha Delhi la khmih lynti ba ka Parliament kan shim ïa kine, hynrei ka Ïingdorbar thaw aiñ ka ri ka khlem shim bad hadien ba la dep ban pyndep ïa la ka kamram ka Congress ka la shim ïa ka rai ban wengnoh ïalade napoh ka EC ba la ïalam da ka NPP ha KHADC.