Ban khia ka KSU ïaki samla pule ban kiar naka shongkha khynnah

0

Nongpoh, Risaw 03: Ka KSU North Khasi Hills District lem bad ka KSU MGU Unit mynta ka sngi ka la pynlong ïa ka jingïalang ai jinghikai kaba kyrpang halor ka jingshongkha khynnah, bad ban ïarap ïa ki samla ba kin kyntiew ïa ka jingpule puthi jong ki bad ban lait na ki jingmlien kiba sniew. Ia kane ka prokram la pynlong ha Lumnongrim Presbyterian Secondary School, Lumnongrim, Byrnihat, ha kaba ki khynnah skul naduh klas 7 haduh klas 10 ki la shim bynta ha kane ka prokram.
Ki nongkren ha kane ka jingïalang kynthup ïa u Samla Herliroy Suitng, Assistant Education Secretary ka KSU North Khasi Hills District, u Samla Laraplang Nongbri, Assistant Education Secretary ka KSU North Khasi Hills District Unit, bad u Samla Welclanstar Lyngdoh Mawphlang, President ka KSU MGU Unit.
Kumba la pynpaw da kitei ki nongialam, ka thong jong kane ka jingai jinghikai ka long ban pynshai ïa ki samla trai ri ba kin long kiba ïoh jingnang jingstad bad kiba lah ban ïarap ïa ka imlang sahlang. Ha kajuh ka por, ka jingthmu ka long ruh ban pynsngewthuh ba ka jingshongkha khynnah ka lah ban ktah ïa ka jingpule ka puthi bad ïa ka lawei jong ki samla.
Ha kane ka prokram, ki nongïalam ki la pynpaw ba ki samla ki dei ban long kiba phikir ha ka jingim jong ki, ban lait na ki jingmlien basniew ryngkat ka jingkyrmen ruh ba ki samla kin kiew shakhmat ha ka pule ka puthi, namar ba ka jylla ka dang donkam shibun ki riew shemphang ban ïarap ïa ka jaidbynriew ha ki liang bapher bapher.

Leave A Reply

Your email address will not be published.