Ban ïoh ïashim bynta ki Dorbar Shnong ha ka thma pyrshah drok

Shillong, Risaw 17 : Khnang ban ïoh ïashim bynta ki Dorbar Shnong ha ka thma pyrshah ïa u drok, shen ka sorkar jylla kan sa wanrah ki jingpynkylla ïa ki kyndon aiñ ka Prevention of Illicit Traffic in Narcotics Drugs and Psychotropic Substance (PITNDPS) Act 1988.
Haba pynbna ïa kane hadien ba la wai ka jingïalang bad ki nongmihkhmat jong palat 10 tylli ki Dorbar Shnong jongka West Shillong Constituency u MLA kane ka Constituency uba long ruh u Myntri ka tnad Social Welfare u bah Paul Lyngdoh u la ong ba la sakhi bunsien ba ki Rangbah Shnong ne Secretary Shnong ki hap ban leit hajir sha ki ïing bishar da ki bun bun sien bad da ki snem lynter bad kane ka la long kum ka jingkhang lad ïa ki Dorbar Shnong ban shlur ban ïashim bynta ha ka jingïaleh pyrshah ïa u drok.
“ Kumta ka tnad Social Welfare ryngkat bad ka tnad pulit kin ïatrei lang ban wanrah kine ki jingpynkylla ïa kane ka PITNDPS Act ha kata ka rukom ba ki Dorbar Shnong kin ïoh ban ïashim bynta ha ka jingïakhun thma pyrshah ïa u Drok” ong u bah Paul.
U la ïathuh ba ïa kane ka rai la shim hadien ba la ïoh jingtip ïa ki jingeh ba ki dorbar shnong ki ïa kynduh haba ki pyntip ne ïarap ïa ki pulit ban kem ïa ki nongkhaïi ne nongdih drok namar ki hap ban long ki sakhi bad hap ban leit hajir beit sha ki ïing bishar.
U Bah Paul ula ong ba ka jingïalang hynne ka sngi ka dei ruh kaba la pynlong kum ka jingpynbud ïaki jingïalang ba la dep pynlong kham mynshwa, kiba ula pynlong bad baroh ki kynhun. Ka jingïalang ba khatduh ka dei kaba la pynlong bad ki seng niam.
U la ong “ Ngi la ïamir jingmut lang kumno ban pynlong ïa ki dorbar ban ïoh ïashim bynta ha ka jingïakhun ïa kane ka thma kaba dei ruh shi bynta na ka thong treikam kumno ban ïadon bynta lang bad ki Dorbar Shnong. “ Ka jingieit ka sdang na la ïing. Ka West Shillong Constituency ka don bun ki jaka ba ïa khaïi ïa u drok bad la ju ïoh jingujor ruh na ka por sha ka por ïa ka jingdon ki nongkhaïi drok ha kiba bun ki jaka” ong u bah Paul.
Haba kylli, u Myntri ula pyntip ba ka East Khasi Hills ka dei kaba don bun eh ki nongdih bad nongkhaïi droks bad la bud ka East Jaintia Hills bad Ri-Bhoi. “Ngi donkam ïa ka jingïatreilang ki Dorbar Shnong. Khlem ka jingïatreilang jong ki, ki jingpyrshang baroh kin ym poi shano shano ruh. Ngi lah ïohi ïa ka jingjop ha ka jingïakhun pyrshah ïa ka khlam Covid da ka jingïa shim bynta lang ki Dorbar Shnong”.
Halor ki rehabilitation centre, u Myntri u pyntip ba ka Sorkar mynta ka la ai jingsumar ei ïa ki nongdih droks ha ki artylli ki centre ha Shillong- Kripa Foundation Deaddiction Centre bad ka KJPA New Hope Deaddiction Centre bad kine baroh artylli ki don ha Mawkasiang, Jowai bad Nongstoin bad Ri Bhoi
Ha kajuh ka por, u Myntri ula pyntip ba ka Sorkar Jylla ka don jingthmu ban buh ïa ki rehabilitation centre ha manla ki shnong ki thaw.
“Ngi la don ïa kane ha ka jingmut jingpyrkhat. Kaba kongsan ïa ngi ka long ba ngin ïoh ïa ka jingkyrshan na ka Ministry kaba wan lyngba ka jingbei pisa ba 90:10 hynrei hooid, ngi don ïa ka jingthmu bad don ruh ka jingsngewkhia halor ka jing bun ki nongdih drok kiba kyntait ban leit shah sumar, na kata ka daw ngi la pynïadon bynta lang ïa baroh ki kynhun naduh ki seng niam bad mynta sa ki nongïalam shnong” ula ong.
Ha kajuh ka por, ka Tnad Pulit ka Jylla ka la phah ïa ka jingtyrwa ban pynmih ïa ka hukum set along ïa 9 tylli ki case jong ki nongdie/nongdih droks ba la kem bunsien kat kum ki kyndon ka PIT NDPS Act.