Lap ka jaka Test dawai ba thied ka ophis DHS da ki dawai bym bit ban dih ki nongpang
Phah pynsangeh ban ai sha ki nongpang ar jait ki dawai kuli
Shillong, Risaw 17 : Ka Regional Drug Testing Laboratory, Guwahati ka la lap ba arjait ki dawai ba la thied da ka Directorate of Heath Services (MI) ka Jylla, ki dei ki dawai taddor/ bym bha satia (sub standard) ki bym bit satia ban ai sha ki paid Nongpang.
Kat kum ka jingshem ka RDTL, kine ki artylli ki dawai ki dei u dawai Paracetamol tablet (Golpara) IP 500 ïa uba la thied kat kum ka batch No GPT 22002, ïa uba la shna (manufacturing) ha u Naitung 2022 bad ba kut por (expired) ha u Jylliew 2025.
Uwei pat u dei u dawai Vitamin C tablet (XTRA-C) IP 500 MG kat kum ka batch no-XTR 2112 ba la shna (manufacturing) ha u Risaw 2022 bad ba kut ka por (expired) ha u Nailur 2025.
Ka khubor ba la ïoh lum ka ïathuh ba Shillong Civil Hospital, ka la phah pynsangeh mardor ïa ki nongai dawai kynthup ki nos, ba kin ai ïa kine ki dawai sha ki paid nongpang tad haduh da pynmih hukum da kumwei pat.
La ïoh jingtip ba u Head Pharmacist ka Civil Hospital, Shillong, ula phah da ka shithi sha baroh ki nos ka Hospital kiba don hapoh ka IPD ba kin sangeh shuwa shipor ïa ka jingpyndih ïa kine ki dawai ïa ki paid nongpang kiba wan sumar hapoh ka Hospital.
Kane ka shithi ba la ïoh copy da ka Shlem, la ïathuh ba kat kum ka Analytical Test Report jong kine ki artylli ki dawai (ba la kdew haneng) ba la leh da ka Government Analyst ka Regional Drugs Testing Laboratory, la shem ba ki dei ki bym bha satia.
La pyntip ba ïa kane ka kaiphod la ïoh pdiang ruh da u Inspector of Drugs ka East Khasi Hills District.
ïa kane ka shithi la phah ruh sha u Additional Director of Health Service kum ka jingpyntip, Dr B Lyngdoh HoD ENT bad sha ka Nursing Superintendent ka Civil Hospital, Shillong.