ïoh kem nongkhaïi drok bad kurup 1.017 kilo u Ampthetamine (crystal meth) ba shongdor 1.15 klur

Shillong, Risaw 17 : Ki Pulit ka East Jaintia Hills mynta ka sngi Ba-ar, ki la ïoh ban kem ïa uwei u snar nong khaïi droks ba na Mizoram uba kyrteng u Joseph Hmangaih Zula 46 snem ka rta bad na ka met jong u, la ïoh ban kurup haduh 1 kilo tam u droks amphetamine uba shongdor palat 1.15 klur tyngka
Une u Nongkhaii droks u dei na South Aizawl, Mizoram bad la ïoh kem ïa u napoh kawei ka bos Night Super (AS 01 LC 6216) ha ka shnong Nongsning kaba don ha surok NH-6, ïathuh u Superintendent of Police ka East Jaintia Hills Jagpal Singh Dhanoa.
Halor ka jingtohkit kat kum ki kyndon ka NDPS Act ha ka jingïadonlang ki sakhi , ki Pulit kila lap ïa kawei ka pla plastic kaba don ïa une u droks, ïa kaba la thep ha kawei ka suitcase rong purple.
Une u droks u khia haduh 1.017 kilo bad ha ka jingtest la pynthikna ba u dei u amphetamine (crystal meth) uba dei u jingdih buaid ba la ñiew beaiñ.
Une u Heh Pulit u ïathuh ba kat kum ka jingtip ba ula ïoh lum, ka la don ka synjuk (syndicate) jong ki nongkhaïi drok ba pynïaid ïew ïa u drok na kawei ka ri sha kawei pat ha kaba ïa u mar (drok) la khaïi ha ka dur jong u crystal meth sha ki Ri ba marjan bad hadien pat la pynkylla ïa u sha ki kuli methamphetamine.
Ia une u briew la register case ha Khliehriat Police Station bad ka jingtohkit mynta ka la ïaid shakhmat ban nang tih jylliew ïa kane ka kynhun nongkhaïi droks.