Shillong, Nohprah 30 : Namar ka jingjyllei palat u dork hapoh ka jylla bad ba ki samla kin phikir lypa na ka jingsniew ba mih na utei u jait jingdih, ka Mawkynrew Sports & Cultural Club (MS&CC) ha ka sngi Thohdieng ka la pynlong da ka jingpynïalehkai phutbol ha ryngkat ka phang pdeng kaba ong “Say No To Drug” ïa kaba la pynlong ha madan ïalehkai phutbol jong ka shnong Mawkynrew, East Khasi Hills District.
Ïa katei ka lympung ïalehkai phutbol kaba la tip ruh kum ka Winter Sports Activities, ka Mawkynrew Sports & CC ka la ïoh ban pynlong lyngba ka jingkyrshan pisa da ka Yess! Meghalaya kaba dei kawei na ki shnat treikam jong ka sorkar jylla ha kaban kyntiew ïa ki kynhun bapher bapher la ka long ki kynhun pynïaid jingïalehkai bad kiwei kiwei bad khamtam eh na ka bynta ki samla.
Ïa ka jingpynïalehkai phutbol la ïoh ban pynlong tang shi sngi ha kaba la sdang ïa ka jingïalehkai da ka semifinal bad ki kynhun kiba la ïashim bynta ki kynthup ka Iaipyrshang SC, Parababiet SC, Kingfisher FC bad Youngsters SC kiba dei ha ka liang ki shynrang. Ha ka liang ki kynthei kiba la ïahim bynta ki kynthup ka Wahshnong SC bad Nongrim SC. Katba ha ka liang ki khynnah shynrang U-13 ka Littlestar, Ryntih, Synroplang bad ka Nongrim.
Ha ka jingïalehkai semifinal baroh ki kynhun ki la jop lyngba ka jingshut tie-breaker hadien ba ki la ïakhaid ha ki jingïalehkai. Ka Ïaipyrshang SC ka la pynliem da 4-3 kol ïa ka Pabababiet SC bad rung sha ka final. Ka Kingfisher FC bad ka Youngsters SC ki la ïakhaid da kaba thep mar shi kol hashwa ba kin poi sha ka jingïashut tie-breaker.
Ïa ka shi kol na bynta ka Youngstes SC la thep da u Mac Donald Nongpluh ha ka minit ba 24 jong ka kylla step katba u Pynshai Surong u la thep ïa ka kol pynïakhaid na bynta ka Kingfishers FC ha ka kylla miet kata ha ka 60 minit.
Ha ka jingïashut penalty, ka Kingfisher FC ka la lah ban pynliem noh da 4-3 kol bad rung sha ka final. Ha ka jingïakhun final kata hapdeng ka Ïaipyrshang SC bad Kingfisher FC ka jingïalehkai ka long kaba mar ïabiang bor bha, baroh ar ki la ïakhun tyngeh ban ïoh khur ïa ka nam jop.
Hapdeng ka jingïalehkai kaba itynnad bad shongshit bha da ka jingwan sakhi ki paidbah naduh ki longkmie longkpa, ki samla bad ki hep kiba rit, ka Kingfisher FC ka la ïoh ban plie pyrda nyngkong ïa ka shi kol ba la thep da u Pynshai Surong ha ka minit ba 65 bad ban nang pynskhem shuh shuh ïa ka kynhun ban khur ïa ka nam jop, u Dapbiang Shylla u la thep ïa ka kol kaba ar ha kaba ka Kingfisher FC ka la lah ban pynliem syndon da 2-0 kol.
Ha ka jingïakhun phainal jong ki kynthei, ka la long shisha kaba itynnad ha kaba ki la lah ban ïalehkai bha baroh arliang khlem da kynran dien bad ka jingïalehkai ka la kut noh khlem da don ba lah ban pynkhih jar. Bad ban ai ka rai jop, la rah noh sha ka jingïashut tie-breaker bad dei ka Wanshnong SC kaba la ïoh khur ïa ka jingjop da kaba pynliem da 4-3 kol pyrshah ïa ka Nongrim SC.
Haba phai pat sha ka jingïalehkai jong ki khynnah U-13 ha ka jingïakhun semi-final, ka Ryntih ka la rung sha ka phainal da kaba pynliem da 4-3 kol pyrshah ïa ka Littlestar katba ka Nongrim ka la pynliem da 2-1 kol pyrshah ïa ka Nongrim. Ïa ki ar kol na bynta ka Nongrim la thep da u Kordial Nongdhar ha ka minit ba 14 bad 24 katba ïa ka shi kol na bynta ka Synroplang la thep da u Banlamlynti Nongpluh ha ka minit ba 26.
Ha ka jingïakhun phainal, ka Ryntih ka la khur ïa ka jingjop da kaba pynliem da 4-3 kol pyrshah ïa ka Synroplang lyngba ka jingshut tie-breaker.
Ha kaba kut jong ki jingïakhun phainal la sam ruh ïa ki khusnam song pisa. Ha kane ka sngi la donlang u Bah Dikostar Lymba kum u kongsan ha ryngkat ka jingïadonlang u Sordar Shnong ka Mawkynrew u Bah Sharmon Warlarpih, u Sordar Shnong Umtngew, Bah Tanbor Surong uba dei u President ka M&SCC.
La ïadonlang ruh ka Kong Aidari Mukhim kaba dei ka nongtrei Asha jong ka Mawkynrew PHC kaba la ai ka jingkren bad pynsngewthuh halor ka jingsniew jong u drok.
Na ka liang u Bah Tanbor Surong u la ai khublei ïa ka Yess Meghalaya kaba la kyrshan ïa ka Club ban pynlong ïa kane ka lympung bad kumjuh ruh ïa u MLA ka thai u Bah Banteidor Lyngdoh uba long ka kti kamon ka kti kadiang ha kaban pynbit pynbiang ïa ki jingdonkam ha ka jingpynïalehkai.
