M anla ka jaidbynriew ha kane ka sla pyrthei ka don la ka jong ka ktien ka thylliej kaba ki kren, ki thoh ki tar bad dei lyngba ka jingdon jong ka ktien ba ka pynithuh ïa ka sha pyrthei ïa ka jinglong jaidbynriew.
Ka jaidbynriew Khasi ruh ka la don la ka jong ka ktien hynrei ïa ki dak thoh la saiñ dur da ki sahep Mishoneri kiba wan sha sha shilliang duriaw. Dei ka jingïoh ïa ki dak thoh ki la paw ki khana pateng, ki puriskam bad kiwei pat ki jait jingthoh kiba buddien ïa la ka jong ka thymmei ka jingwan longbriew jong ka jaidbynriew Khasi ha kane ka sla pyrthei.
Ha kum kane ka juk, kiba bun hi ki la sdang ban ïaid lait ne ban kiar ban kren ïa la ka jong ka ktien, hynrei ki klet ba ka jingma kaba la ap lypa ka long namarba kano kano ka jaidbynriew kaba klet ne ka bym ñiewkor shuh ïa la ka jong ka ktien ka lah ban jah rngai noh shi syndon na kane ka sla pyrthei.
Kiba bun na ki heprit ha kane ka juk ki kham sngewtynnat ban kren ïa ka ktien Phareng. Hoaid, dei ban hikai ïa la ki jong ki khun ïa ki ktien jong kiwei ki jaidbynriew khnang ba kan pynsuk kumno ban pynïadei bad kiwei pat ki jaidbynriew. Hynrei kaei kaba jia mynta ka long ba ki khynnah rit ki kren ïa ka ktien lajong tang namarba la ïakren ha la ka jong ka rympei iing katba ha ka thoh ka tar bad ka pule ka puthi ki thoh kat kaba ki ïoh jinghikai na ki shlem ba ki pule, pynban ka rukom thoh ïa ka ktien lajong ka la ïapher bak ly bak namarba kim da phoida eh haduh katta katta ban ngam jylliew shuh shuh ïa ki ktien tynrai kiba la hikai da ki menbarim. Kum ban shu kdew nuska, wat ïa ki tiar ki tiar ruh, ki jingtem ki jingput, ki khynnah mynta ki kham tip bha ha ka ktien Phareng hynrei ynda kylli ha ka ktien lajong bun ki ong ‘ngim tip.” Hato ka dei na ka daw ba ki kmie ki kpa kim don por shuh ban kdew bad ban hikai ïa la ki khun?
Ka jaidbynriew Khasi ka dang shngaiñ namarba ki dang don ki riewshemphang kiba ïai peitngor bha kumno ban pynneh bad ban pynsah ïa la ka jong ka ktien ka thylliej. Ki da trei borbah ruh ban ïasam lem ïa ki jingnang jingtip jong ki sha kiwei pat khnang ba ka ktien kan ïaineh ïaisah, pynban hapdeng ka jingtrei ba jarjar, sngew pat ban ong ba kiba bun ïa ka ktien lajong da leilei kim treh shuh ban kren ïa ka. Hato aiu sha ha lyndet ba kim treh ban kren shuh ïa la ka jong ka ktien? Hato don mo ka buit sianti jongno re ban pynthame ne ban sait khuid na ka jabieng ban kynther jymbuiñ noh shi syndon ïa la ka jong ka ktien? Ban ïoh ïa ka jubab jong kane baroh ka shong ha man uwei pa uwei na ki paid Khasi baïar ban ïathir ïawoh ne ban wad ïa ka daw tynrai jong ka.
Ki riewshemphang ki ju pynlong ïa ki lympung ïaphylliew jingmut kumno ban nang pynïar ïa la ka ka ktien, pynban sngew pat ban ong ba kine ki lympung ki shu kut noh tang ha ki saw kynroh jong ki lympung namarba ki nongïathir bad ki nongïatai ki tip bad ki shemphang hynrei lada ïakren salonsar kiba bun ki la klet lut ïa ki ktien tynrai.
Kiwei ki jaidbynriew ki kheiñ kor bad ki ñiewkor bha ïa la ka jong ka ktien bad haba kren da ka ktien Phareng kim ju jubab hynrei ki kren beit da ka ktien lajong. Mano ba hikai ïa ki ban ieid bad ban ñiewkor ïa la ka jong ka ktien, hato ym dei ki kmie ki kpa kiba sdang shwa na la ka jong ka rympei iing? Kiwei ki jaidbynriew yn shem wat haba ki don paramaki ki kham ieid bad sngewtynnat ban kren da ka ktien lajong bad kane ka long ka nongmuna kaba kum ka jaidbynriew kan hap ba kan bud ïa ki nuska ban pynneh ban pynsah ïa la ka jong ka ktien ka thylliej.
Lada ngi dang kwah ban pynneh pynsah ïa la ka jong ka ktien, ka kamram kaba nyngkong eh ka long ban ïakren ïakhana shuwa ïa la ka jong ka ktien. Pynban kum ka jaidbynriew, kumba ka ladep ba kan jia teng, imat ka por ka la wan poi biang, ba ka erlangthari kaba wan ban beh na sha shilliang duriaw mynta sa shisien ka la wan ba kan beh biang kumta lada ym skhem ka tynrai, khlempep kan rong noh shisyndon ïa ka jaidbynriew na kane ka sla jong ka pyrthei.
Kumta, kum ka jaidbynriew ka donkam ban kyndit bynriew noh bad ban shimkhia khnang ban ym klet ïa la ka jong ka ktien ka thylliej ïa kaba duna yn nang ïatrei shitom shuh shuh na ka bynta ban pyndap ïa ka. Kum ka nuksa balei ba ka ktien Phareng ka roi bad kren ïa ka da kiba bun ki bynriew ha ka pyrthei, ka daw ka long ba nalade shwa ka la lah ba kan pynneh ba kan pynsah bad ïa kaba duna ka bteng pat sa ba kan shim kylliang ïa ki ktien na kiwei pat ki jaidbynriew kaba bteng ba kan nang ïai pynkhraw shuh shuh ïa ka ktien jong ka.
Lehse kam don jingeh ban ong ban ym nang shuh ban kren ïa la ka jong ka ktien bad kaba sngew thamula ka long ruh ba ki don ki para Khasi kiba leit sah shabar jylla bad shabar ri hana ki ong ba kim nang shuh ban kren ïa ka ktien lajong katba ki dang don pat ki para Khasi kiba sah shabar naduh dang rit haduh ban da tymmen hynrei kiba dang ieid ïa ka tynrai lajong bad ki kren ïa ka ktien Khasi tiak tiak bad ki da hikai de ïa la ki jong ki khun kumno ban nang ïa ka ktien Khasi.
