Nongpoh, Ïaiong 02: Ka Warmawsaw Cluster Resource Centre hapoh ka jingïalam jong u Bah Blandar Lyngdoh CRC Co-ordinator lem bad u Babu Sanki O Lamare Secretary Sports Secretary ka Warmawsaw CRC haka 1 tarik ïaiong kala sdang ïaka 3rd Warmawsaw CRC Annual School Sports Meet ha madan ïalehkai ha Warmawsaw.
Ïa katei ka lympung ïalehkai sports ba 3 sngi lynter la wan ban plie pyrda da u Babu C Doloi Headmaster ka Warmawsaw Secondary School, haka jingdonlang ki nongïalam shnong, ki nonghikai bad kiwei kiwei ki riew rangbah ryngkat 28 tylli ki skul jong ka Jirang Block kiba la wan ban shim bynta shitrhem ha katei ka lympung.
U Babu C Doloi haba kren ha katei ka sngi u la ong ba ka kam ïalehkai sports ka dei kaba donkam haki khynnah khamtam ha kane ka juk ba mynta ba ka met jong ki kan long kaba shait ba khlaiñ bad lada ka met ka khlain ka jabieng ruh ka khlaiñ ban minot haki jingpule jong ki ba man ka sngi.
U la kyntu ruh ïaki khynnah ba ki dei ban pyndonkam hok ïaka sap ïalehkai jong ki ryngkat ryngkat bad ka jingpule jong ki ba kin nang ban bate ïaka por namar ki samla ïalehkai kiba don ka sap kin dang kiew shaphrang ryngkat ka sap kaba ki don haka jingim jong ki.
