Shillong, Naitung 31 : Ka Meghalaya Grassroots Music Project (MGMP) kala ïatrei lang bad ka Hard Rock Cafe India ban pynpoi ïa ki sur ki nongput nongtem bad kaitor jong ka jylla Meghalaya sha ki paidbah ha kylleng ka Ri.
“Kane ka jingïatreilang, ka thmu ban pynshlur ïa ki kynhun tem na ka thaiñ lyngba ka jingleit pynbyrngia ha ki nongbah bapher bapher ha ka ri India, kaba ai ïa ki lad ki lynti kiba kim pat ju don mynno mynno ruh,” ong u nongpynïaid jong ka MGMP Season 2 Bah Andreas War ha ka jingïalang bad ki nongpathai khubor kaba la long ha ka sngi Balang.
Ula ong, ba kane ka jingïatreilang kan ïohi ïa ki nongrwai ba tbit jong ka MGMP ba kin kiew ha ki rynsan tem jongka Hard Rock Cafe ha ki nongbah kiba heh, kaban ailad ïa ki nongieit jingrwai ha baroh kawei ka ri ban ïoh mad ïa ki sur ba kyrpang jong ka jylla Meghalaya.
“Kane ka jingïatreilang ym tang ba ka ai ka rynsan kaba kham heh na ka bynta ki nongtem jong ka Meghalaya hynrei ka pynïasoh ruh ïa ka kolshor ba riewspah jong ka thaiñ sha ka put ka tem ha ki jaka sor ka ri India.
Da kaba pynïasoh lang ïa ka rukom treikam jong ka MGMP bad ka Hard Rock Cafe, kane ka jingthmu ka kular ban kyntiew ïa ka jingïasam kylliang ha ka kolshor, ban kyntiew ïa ka kam jngohkai pyrthei ha ka thaiñ, bad ban rakhe ïa ka jingriewspah ka rwai ka siaw ha ka ri India,” ula ong bad ka bynrap ba ryngkat, ka MGMP bad ka Hard Rock Cafe India kila buh ban thaw ïa ki sur jong ki kolshor, ka sur naduh ki lum jong ka Meghalaya haduh ki nongbah ba heh jong ka ri India, ban pynthikna ba ïa ki sur jong ki nongrwai trai ri la ïohsngew sha jngai bad ha kylleng ki jaka. Ka jingïaroh ka leit sha ki riewshimet bad ki kynhun kiba don sha lyndet jong kane ka projek kaba phylla, kaba la ïarap ïa ki hajar ngut ki nongrwai/nongtem ha ka Jylla Meghalaya. U Myntri Rangbah ka jylla u Conrad K Sangma, myntri ka tnad jngohkai u Bah Paul Lyngdoh, ki kynhun kiba la aiti lut na ka tnad jngohkai pyrthei, ka Meghalaya Age Limited bad ka Opus Productions.”
Ka MGMP ka la shim ia ka sienjam kaba nyngkong eh kaba thmu ban pynroi bad kyntiew ïa ka pateng ka put ka tem ba riewspah jong ka jylla Meghalaya.
