Shillong, Risaw 31: Ka jingmih ki jingïashoh briew ha ka rally ba la khot pynlong da ka Seng FKJGP ha ka 28 tarik mynta u bnai, ki bor synshar District ki la pynjari daka Section 144 CrPC ha baroh kawei ka nongbah Shillong.
Ka jingpynbna ka DC jong ka East Khasi Hills District, ka Kong I. Laloo, ka ong ba ki la ïoh jingtip ba ki dang don sa kiwei pat ki Seng bad ki Kynhun kiba thmu ban pynlong ïa ka jingïaid paidbah ha nongbah Shiillong ha kine ki sngi ban wan.
Ka jingpynbna paidbah ka ong ba la ïoh bunsien ki Seng bad Kynhun haba ki pynlong ïa ki jingïaid paidbah kiba kum kine kim ju bud satia ïa ki jingbthah kiba la ai ha ka por ba ki pan jingbit.
Shuh shuh ka ong ba kane ka jingïaid paidbah haba ki mih ki jingïashoh ïa dat ka wanrah ka jingtieng jingsmiej ha ki khynnah skul, ki kmie ki kpa, ki nong ïaid lynti bad kiwei kiwei.
Kumta khnang ban khanglad ïa kine ki jingjia ba ktah ïa ka suk ka saiñ, ki bor synshar District East Khasi Hills, ki la pynjari da ka Section 144 CrPC, ha kaba la khanglad ïa ka jingïaïaid paidbah, ka jingïalum briew ba palat san ngut ha ki bynta jong ka nongbah Shillong.
Hynrei kane ka jingpynajri kan nym treikam pat ïa kino kino ki kam Niam kiba ladep ban pan jingbit bad kiba la kular ban bud ryntih ïa ki jingbthah ki bor sorkar.
