Shah kem uwei, ladep ithuh dur khmat ki Pulit ïa kiba donkti shoh briew ha ka rally ka FKJGP

0

Shillong, Risaw, 31: U Myntri Rangbah ka Jylla u Conrad Kongkal Sangma ha ka Lah Sngi U Blei u la ïathuh ba ki Pulit ki la ïohkem ïa uwei u briew uba donkti ban shoh ïa ki nongleit nongwan ha ka jingïaid rally pyrshah ïa ka jingbym ïohkam ba la pynlong da ka Federation of Khasi Jaiñtia and Garo Peoples (FKJGP) ha ka 28 tarik u mynta u bnai.
Da ki phew ngut ki nongleit nongwan kiba dei ki bar jylla ki la shah thombor ha ki briew kiba kah durkhmat ha ka jingïaid rally pyrshah ïa ka jingbym ïohkam ba la pynlong da ka FKJGP na Motphran sha madan Iewrynghep, Laitumkhrah, Shillong.
Ha ka jingïakren bad ki lad pathai khubor, u Myntri Rangbah u la ïathuh ba ka Sorkar ka la shong ïa ka Review Meeting ha kine ki shi sngi ar sngi ban ïathir ïatai ha kaba ïadei bad ki jingshah thombor jong ki riewpaidbah ha ka jingïaid rally ka FKJGP bad kumjuh ruh ban tehlakam ïa ka jingkhaii drok ha ka jylla.
“Ha ka Review Meeting ngi la bthah ïa ki Pulit ba kin leh la ka jong ka kamram bad ban pynthikna ban bud pyrkhing ïa ki kyndon treikam ha ki sngi ban dang wan,” ong u Sangma.
“Ki Pulit ki la ïohkem ïa uwei u briew bad ki don ruh sa lai tylli ki ejahar ba ladep mudui. Ki Pulit ki ladep ithuh durkhmat ruh ïa bun ngut ki briew kiba donkti ban thombor ïa ki riewpaidbah ba luilui bad ka aiñ hi kan sa leh la ka kamram pyrshah ïa kiba donkti,” la ong u Sangma.
Katkum ka jingïathuh jong u Myntri Rangbah ki don lai ngut ki briew kiba la mynsaw na ka jingshah thombor ha ki nongïaid rally.
U la ïathuh ruh ba ki don kumba ar ne lai tylli ki kali kiba la shah pynjulor kham bun ki dei ki Scooty ar shaka bad kawei ka kali Gypsy jong ki shipai.
“Kine ki jingjia kim dei satia ka jingphiel jong ka tnat syntiat khamtam haba ki nongpynlong ïa ka rally ki ladep pan jingbit da kaba kular ban bud ïa ki kyndon kiba la bthah bad ki bor synshar district ruh ki shahniah ïa kata ka jingkular, hynrei khlem poi pyrkhat ba kan mih pynban kum kato ka jingjia kaba pynkyndit ïa baroh,” la ong u Myntri Rangbah.
Shuh shuh u ong ba ha ki jingshah thombor jong ki riewpaidbah katto katne ngut kiba donkti ki dei kiba la dep ithuh durkhmat napdeng ki 1500 ngut eiei kiba ïashim bynta ha ka jingïaid rally ba la pynlong da ka FKJGP.
“Ngi lap ba ki don tang katto katne ngut kiba thaw jingkulmar bad kane ka long kaei kaei kaba pynkyndit ïa ki riewpaidbah,” u la bynrap.
“Ki nongpynlong ïa kane ka prokram ki dei ban shim ïa ka jingkitkhlieh bad namar ka jingmih jong kine ki jingjia kan pynlong ïa ka Sorkar ban kham pyrkhing noh ha kine ki sngi ki ban sa wan bad ban tehlakam ïa ka jingbym shngaiñ ka shongsuk shongsaiñ.

Leave A Reply

Your email address will not be published.