Ba shimkhia ki nongïalam bad dkhot ka EJHDTTA la lah ban tehlakam ïa ka dheng kali ha Ladrymbai
Khliehriat, Nailar 10: Ki surok khamtam ka national highway ha Ladrymbai, ka dei ka jaka ba jia khah khah ka jingdheng kali man la ka sngi kaba ju buh jingeh bha ïa ki nongleit nongwan, hynrei lyngba ka jingiatreilang bad ki nongïalam lem bad ki dkhot jong ka East Jaiñtia Hills District Tourist Taxi Association (EJHDTTA) ba la lam khmat da u President u bah Satly Ryngkhlem lem bad ki bor pulit jong ka Ladrymbai Outpost mynta la lah pat ban tehlakam ïa kane ka jingdheng kali ha Ladrymbai.
Ki nongïalam ba kynthup ruh u Secretary ka EJHDTTA, u bah Emi Ksoo, lem bad ki dkhot ki la shim khia lang ban pynïaid beit ïa ki kali ha surok ha Ladrymbai bad ïa kane ka kam katei ka Association ka la sdang naduh hynnin ka sngi, kane ka la ïarap shibun ïa ki pulit pyniaid kali, namar mynta ki kali kiba dei ban leit sha Shillong, sha Jowai bad sha ki shnong bapher bapher ki la ieng beit da u laiñ ha la ki jaka ba ki dei ban ieng bad kane ka jinglong ryntih ka la pynitynnad shi katdei eh ïa ka jaka ha Ladrymbai bad kane ka pynsuk ruh ïa ki nongleit nongwan kiba donkam ban shim kali lada ki donkam ban leit sha kino kino ki jaka.
Na ka liang u bah Satly Ryngkhlem, u la ong ba ka Association hadien ba ka la iohi ïa ka jingdheng kali kaba ju jia khah khah ha Ladrymbai, ki la pynlong da ka jingïalang kaba kyrpang bad ki la shim ïa ka rai ban iarap lem ïa ki bor pulit ban pynïaid ïa ki kali khnang ban weng noh ïa kane ka jingdheng kali bad ki la shim ïa kane ka synjam ban mih sha khmat ban trei lang na ka bynta ka bha ka miat ha ka imlang ka sahlang.
Shuh shuh, na ka liang ka Association, ka buh ïa ka jingkyntu ïa baroh ki nongñiah kali ba kin sngewbha ban ai ka jingiatreilang bad ka Association bad kumjuh ruh bad ki bor pulit, ban kiar na kaba pynieng pathar ïa ki kali ha surok lane ha ki rud surok kiba i khapngiah khnang ban lait na ka jingdheng kali, namar lada don ka jingdheng kali kan buh jingeh ym tang ïa ki paidbah ba leit ba wan, hynrei kan buh jingeh ruh ïa kiba pang ba shitom bad kumjuh ruh ïa ki kali ba kit nongpang, kumta ka Association ka khmih lynti ba da ka jingiatreilang kane ka jingbeit jingryntih ki kali ha Ladrymbai kumba long mynta kan neh ha baroh ki por.